Kalaaleq nakorsanngorlaaq: Ileqqaarutitut isigineqartariaqarpugut

- Soorunami nuanninngilaq. Angummik Nunatsinnut attuumassutilimmik naapitaqarlunga iluatsitsinngikkaluarpunga. Nunatsinnukarnissarput ilinniarnera tamaat pilersaarutiginikuugaluaratsigu piviusunngunngimmat uggornaqaaq. Kalaallit Nunaanni najugaqareersunit tunulliunneqartutut misiginarpoq, Rie Rasmussen oqarpoq.

Taanna uimisulli nakorsatut naammasseqqammerpoq, marlunnillu meeraqarlutik. Ataaseq marlunnik ukiulik aappaalu pingasunik ukiulik. Meeqqallu ukiukinneri Nunatsinnut utersinnaanngikkallarnerannut pissutaapput:

Meeqqat maannakkut meeqqerivimmiittussaanerisa nalaanni Kalaallit Nunaannut nuukkaluarutta iluarnerussagaluarpoq, atualereerpata nuuttarnissaq  soorunami ajornakusoornerussammat. Nunatsinnut uterusukkaluarpunga, kisianni sivisunerusumik Nunatsinni najugaqarnissara ukiorpaalunni suli utaqqisariaqassagunarpara, Rie Rasmussen oqarpoq.

-  Nuussagaluarutta paaqqinnittartoqartariaqassaagut anngiortumik ingerlasumik. Taama inissikkusunngilagut, oqarpoq, nangillunilu:

- Nunatsinnut utertartut arlallit ilisarisimavagut. Meeqqallu paaqqutarineqarnissaannut periarfissat misissullattaasimallutigit. Takusinnaavarpullu paaqqinnittarfinni inissaqanngitsut, taamaammat angerlarsimaffimminni paaqqinnittartut sulilluartut amelagaluartut, nuanninngitsumik misigisaqarfiusartut aamma amerlavallaaqaat. Soorunami Nunatsinnut utissagutta meeqqagut paaqqinnittarfimmi inissaqartinneqarnersut paaseqqaarusupparput, Rie Rasmussen oqarpoq.

- Danmarkimut ilinniariartorsimaneq pissutigalugu, nunaqqatinit ajoernerusumik inissinneqartutut misiginarpoq. Kalaallit inuusuttut Danmarkimut sivisunerusumik ilinniariartartut ileqqaarutitut isigineqarlutik Kalaallit Nunaannut uternissaminnut pilerisaarneqarlutik ikorfartorneqartariaqarput, Rie Rasmussen oqarpoq, nangillunilu:

- Kalaallit Nunaannut angerlaqqinniarluni pisariullunilu aporfissaqarpallaarneq pissutigalugu Nunatsinni sulilluarsinnaasut annaaneqartarput. Danmarkimi ilinniarnermik nalaanni ilaqutaqalersimasut Kalaallit Nunaannut uterniarunik aappariligartik pilerisaaqqaartariaqartarpaat, tamarmimmi uattut iluatsitsitigisinnaanngillat, kalaaleq nakorsanngorlaaq Rie Rasmussen, Tasiilameersoq, oqarpoq.