Sakio Fleischer: Pakatsivunga, unamminerulli malitsigisinnaasai aamma ilisimavakka
Siumumeersup Sakio Fleischerip pakatsissutigaa Avannaata kommuniani attaviitsoq Palle Jerimiassen borgmesterinngortussanngormat.
- Soorunami oqartariaqarpunga pakatsillunga. Kisianni politikki taamaappoq, pissutsit taamaalinerat akueriinnagassaavoq, Sakio Fleischer oqarpoq.
AAMMA ATUARUK Pisortatigoortumik nalunaarut: Palle Jeremiassen avannaani borgmesterip issiavianut ingeqqippoq
Unnuaq marlup tungaanut naatsorsuutigigaluarpaa borgmesterinngorumaarnissi. Taassumali oqarnera naapertorlugu attaviitsoq Palle Jerimiassen Siumumut tunoqqutsilluni isumaqatigiissuteqarsimavoq, tassa Siumumut isumaqatigiissuteqaqqaaratik.
- Naluneqanngitsutut apriilimi Naleraq atsioqatigaarput. Atsioqatigiinnerlu taanna una sapaatip akunnera tikillugu atuuppoq - unnuarlu nalunaaquttap marlunngornera tikillugu borgmesterissatut atorunnaarsitaavunga. Paasivarputtaaq isumaqatigiissut aamma atorunnaarsitaasoq, Sakio Fleischer KNR-imut oqarpoq.
Sakio Fleischerip itisilinngilaa, unnuaq marlup tungaanut Siumumiit kina isumaqatigiissuteqarfigineqarsimagaluarnersoq
AAMMA ATUARUK Minik Høegh-Dam hashimut tunngatillugu suliaq allallu pissutigalugit Siumumit anisinneqartoq
Apriilip arfernani qinersisoqareernerata kingornali, avannaata kommuniani borgmesterinngorniunnermut saqitsaattoqalerpoq.
Qinigaanerpaarlu Minik Høegh-Dam (S), partiiminiit anisitaavoq, KNR-ip oqaluttuareermagu, inatsisit unioqqutillugit hashimik 300 grammimik tuniniaasimasutut unnerluunneqarsimasoq.
Suliaq Kommuneqarfik Sermersuumi eqqartuussivimmi marsip 25-iani ingerlanneqarsimavoq tassa qinersisoqaleruttornerata nalaani, tassanngaanniillu pinngitsuutinneqarpat Suliaq Kalaallit Nunaata eqqartuussiveqarfianut ingerlaqqittussaavoq.
Kommunemi borgmesteriusimasoq Palle Jerimiassen Siumumiit anivoq attaviitsunngorlunilu. Tamanna isumaqarpoq, kommunalbestyrelsemi 17-nik inissalimmi Siumut arfineq-marluinnarnik aallartitaqalerneranik. Taamaalilluni Siumut amerlanerussuteqassaguni partiinik allanik nalimmassartariaqalerneranik kinguneqartumik.
Taamaalimmat Sakio Fleischer toqqarneqarpoq taannami kommunemi qinersinermi qinerneqarnerpaat pingajoraat. Taassuma Naleraq suleqatiginiarlugu isumaqatigiissuteqarfigaa - pingasunngormalli Siumut nalunaarpoq, Naleqqamik suleqatiginnikumajunnaarlutik.
Sakio Fleischer initoqaluni kiserngoruteriataarpoq. Tassami Inuit ataqatigiit, Atassut, Demokraatit Naleraq aammalu attaviitsoq Palle Jerimiassen Siumut tunoqqullugu unnuaq suleqatigiinnissamik isumaqatigiissusiormata.
Suleqatigiinnermiit illuatungiliuttuunermut
Siumut Avannaata kommuniani suleqataajunnaartussanngoraluartoq Sakio Fleischer ingerlaqqissaaq.
- Maanna illuatungiliuttunngoraluarlunga, naatsorsuutigissavara anguniakkagut angutserlugit sulisussaagatta. Kommunalbestyrelsemi ataatsimiititaliani arlalinni ilaasortaqassaagut, tassuunaqquullutalu suliarput ingerlateqqissavarput, Sakio Fleiscer KNR-imut oqarpoq.