Pisortap tullia nutaaq RAL-imi 2019-imi allanngortiterisoqangaatsiassaaq

Suliffeqarfiit marluk ingerlanneqarnerat aporaaffeqarnavianngitsoq, Aviâja Lyberth Lennert oqarpoq:

- Royal Arctic Linemi Arctic Umiaq Linemilu suleqatigiillutik, Sarfaq Ittuup angalasarnera isumannaartarpaat, suleqatigiinnerlu ingerlaannaassaaq, taamaattumik akisussaaffiit imminnut aporaannatik imminnut iluaqutsernissaat qularutiginngilara, Arctic Umiaq Linemi pisortaq, Royal Arctic Linemilu pisortap tulliatut ukiortaamit atorfinittussanngortoq, Aviâja Lyberth Lennert oqarpoq.

AAMMA ATUARUK Royal Arctic Linemi pisortaqarfik inerisarneqartoq

Royal Arctic Linemi siorna contanerinik assartuinermi kukkusumik niusisoqartarsimavoq. 

- Tamanna peqqissanngippat, illillu akisussaaffiit marluk tigummisussanngorpatit - tamanna kivisinnaaviuk?

- Aap, siorna taamaalinerani ajornartorsiutivut massakkut qaangereernikuuagut, massakkullu Royal Arctic Linep nukittorsarneqarnissaanut uanga inissippunga, Aviâja Lyberth Lennert oqarpoq. 

AAMMA ATUARUK RAL-ip nunaqarfinnut umiarsuaaqqat nutaat marluk inniminnerai

Naak unammillernartoqarsinnaagaluartoq umiarsuit nutaat aappaagumit atulerpata allannguisoqassaaq

- Ulluinnarni sulinitsinni unammillernartoqarsinnaavoq, umiarsuit aappaagumit tikittussat angallassisalertussaapput, nunatsinnilu Islandi ilaatigut aqqusaarlugu sapaatip akunneranut umiarsuaqartalissaaq, taamaattumik allannguisoqartussaavoq, tassanilu ataqatigiissaarisussanngussaagut, Arctic Umiaq Linemi pisortaq Royal Arctic Linemilu pisortap tulliatut ukiortaamit atornittussanngortoq, Aviâja Lyberth Lennert oqarpoq. 

Pisortaqarfik anginerusoq iliuuseqarnissamut nukissaqartitsinerussaaq, taamalu sullitatta soqutigisaannik pitsaanerpaamik qulakkeerinnissutaassaaq - taamaattumillu Royal Arctic Linep nutarterineranut atatillugu pisortanik marlunnik ilasisoqartoq, RAL-imi siulersuisuni siulittaasoq, Ulrik Blidorf nalunaaruteqarpoq.

AAMMA ATUARUK RAL-ip assartuinermi ajornartorsiutai aaqqikkiartulerunarput