Vittus Qujaukitsoq: Kangerlussuaq Narsarsuarlu pillugit ernumassutissaqanngilaq
- Naalakkersuisut aammalu tapersersortaasa Narsarsuaq Kangerlussuarlu pillugit ersarissumik oqariartuuteqarnikuupput, innuttaasut qulaatiinnarlugit kommunillu aalajangiinavianngilagut, taamaattumik nunaqarfiit taakku siunissaat pillugu ernumassutissaqanngillat, Naalakkersuisuni ilaasortaq, Vittus Qujaukitsoq ataasinngornermi Qanoruumi oqarpoq.
Mittarfiup Kangerlussuup siunissaa pillugu ersarissumik nalunaaruteqartoqaqqullugu, Sisimiuni Kangerlussuarmilu innuttaasut arfininngornermi ingerlaaqatigiipput.
AAMMA ATUARUK Danmarkimut Kalaallit Airportsimi pissaaneqalersitsisoq
Qularnerallu mittarfinnut pilersaarutip sisamanngornermi naammassillugu suliarineqarnissaanik pissuteqarpoq. Mittarfiit nutaat sanaartorneqarpata nunaqarfinni, Kangerlussuarmi Narsarsuarmilu atugassarititaasut allanngungaatsiassapput innuttaasullu amerlasuut suliffissaarutitinneqassallutik.
Suleqatigiinnik marlunnik, Namminersorlutik Oqartussat kommunillu suleqatigiiffigisaanni mittarfiit taakku siunissaannik paasiniaasussanik pilersitsisoqarsimasoq, Naalakkersuisut maannamut nalunaarutiginikuuaat. Tamassumalu saniatigut Kangerlussuup mittarfiuinnassanera oktobarip naanerani nalunaarutigineqarpoq.
AAMMA ATUARUK Sisimiuni Kangerlussuaq pillugu ingerlaqatigiittut
Danmarkillu aningaasatigut tapersiissuteqarnerani isumaqatigiissut atlantikoq qulaallugu timmisartuussisarfitoqqanut periarfissagissaarnerutitsiniarnerusoq, Vittus Qujaukitsup Qanoruumi ilanngullugu oqaatigaa.
- Taamaattumik uani imminut akilersinnaanissaanik mittarfiit nutaat sananeqartussanut piumasaqaatit tassuunakkut qasukkarnikuupput. Taamaattumik pineqartut ingerlariaqqinnissaannut periarfissanik Naalakkersuisut sulinissatsinnik neriorsuuterput taanna soorunami eqquutsissavarput, Vittus Qujaukitsoq taama oqarpoq.
Nunaqarfiit taakku marluk matuneqarnissaat pilersaarutaanngitsoq Qujaukitsup aamma erseqqissaatigaa.
