Inuit sisamat hashimik anngiortumik eqqussisimasutut eqqartuunneqartut
Eqqartuunneqartunit sisamanit ataatsip eqqartuussivimmi suliaq suliassanngorteqqippaa.
Inuit sisamat hashimik 6 kilomik anngiortumik eqqussisimasutut, tigummiagaqarsimasutut tuniniaasimasutullu decembarimi pineqaatissinneqarput.
Suliami pingaarnertut pasisaq, Svend Beck, pineqaatissinneqarsimasunut ukioq ataaseq affarlu inissiisarfimmiittussatut pineqaatissinneqarpoq. Angutit marluk allat pineqaatissinneqarsimasunut qaammatit arfinillit inissiisarfimmiittussatut pineqaatissinneqarput, unnerluutigineqartorlu kingulleq, arnaq, pineqaatissinneqarsimasunut qaammatini qulini inissiisarfimmiittussatut pineqaatissinneqarpoq.
AAMMA ATUARUK Akitsuuserisut hashimik siorna aasarinnissuteqarnerusut
Arnaq suliareqqitassanngortitsisoq illersuisua KNR-imut paasissutissiivoq. Pingaarnertut pasisap angutillu ataatsip eqqartuussut akuerivaat, pineqaatissinneqartunili sisamaata eqqartuussut qanoq isummerfigineraa illersuisuata KNR-imut paasissutissiissutigerusunngilaa.
Pineqaatissinneqartut sisamat pissunut katillugit 14-inut unnerluutigineqarput, ilaannaannili pisuutinneqarlutik. Politiit naapertorlugit pineqaatissinneqartut sisamat ikioqatigiillutik hashimik anngiortumik eqqusseriarlutik Qaqortumi, Nanortalimmi, Paamiuni, Sisimiuni Aalborgimilu hashimik tuniniaanngikkunik toqqortaqarsimasuupput.
AAMMA ATUARUK Fire tiltalt i sag om 6 kilo hash
Unnerluutigineqartoq ataaseq Royal Arctic Linemi sulisimavoq, hashillu ilaa umiarsuaatileqatigiiffiup umiarsuaataanik Aalborgimit Nanortalimmut anngiortumik eqqunneqarsimassassoq, politiit allapput.
Haship tuniniarneqarnerani 2,7 million koruunit missaanni iluanaarutaasimanissaa naatsorsuutigineqarpoq. Aningaasat ilaatigut umiatsianik, biilinik elektronikkinillu pisinermut atorneqarsimasut unnerluussummi atuarneqarsinnaavoq.
AAMMA ATUARUK Eqqartuunneqartut tamarmik suliareqqitassanngortitsisut
Nunatsinni hashi pillugu eqqartuussivitsigut suliat annerit ilaat siorna aggustimi naammassineqarpoq. Tassani inuit arfineq-marluk hashimik 60 kilomik Danmarkimit nunatsinnut anngiortumik eqqussisimasutut pineqaatissinneqarput. Suliami tassani pineqaatissinneqartut tamarmik suliareqqitassanngortitsipput.