KAK: Arsaannermi angutit Ilulissani GM-ssapput
Arsaaffik ivigaasaaqqanik qalligaq nutaarsuaq unnuisarfiusussallu siorna Ilulissani GM-qarnissaanut piareersimagaluarput. Arsaannermili GM coronamit naallerneqarpoq.
Aaqqissuisussaagaluit maanna saammarsaaserneqarput. KAK-mi kingullermik ataatsimiinnermini aalajangerpoq angutit GM-qarnissaat Ilulissat augustip aallartilaarnerani pissasoq.
AAMMA ATUARUK Klubbimi siulittaasoq: GM tikeraaqattaannikkut pisinnaagaluarpoq
Aalajangerneq tamanna Nagdlúnguarmiut nuannaarutigaat tassami 2019-mi pissartanngornertik namminneq arsaaffimminni siorna illersortussaagaluaramikku.
- Tamanna assorujussuaq nuannaarutigaarput, soorlumi maanna qaamanermik takusaqarsinnaalersugut, Nagdlúnnguami siulittaasoq Lena Ravn Davidsen KNR-mut oqarpoq.
Kissaatigisartik pivaat
Immikkut akuersissuteqarnikkut pissartanngorniuttoqarnissaa KAK-mit siorna ilungersuutigineqaraluarpoq. Kommuneqarfiilli killeqarfii akimorlugit nalunaaqqaarluni aaqqissuussisoqarsinnaanngikkallarneranut malittarisassat apriilip 30-ta tungaanut atuutut Naalakkersuisut innersuussutigaat..
AAMMA ATUARUK Anna Wangenheim: Coronamut killilersuinerup sivitsornissaa pingaaruteqarpoq
Silami arsaannermi GM-rtoqarsinnaanera aatsaat pisinnaavoq kommuneqarfinnit assigiinngitsuniit peqaasoqarluni aaqqissuussisinnaaneq aammaanneqaqqissappat.
- Aaqqissuussisuunissamut piareersimavugut. Siornali sungiusaasorisavut piumasaqarnikuupput aaqqissuisuunissaq qulakkeerniassagipput, Lena Ravn Davidsen oqarpoq.
AAMMA ATUARUK KAK: Isikkamik arsaannermi pissartanngorniuttoqarnissaa taamaatinneqarpoq
Pissartanngorniunnissanut allat qaqugu sumilu pinissaat aamma aalajangersarneqarpoq.
Niviarsiaqqat U-15-it Aasianni GM-ssapput nukappiaqqallu U-15-it Sisimiuni GM-ssallutik. Unammersuarnerit taakku juunip naanerani juulillu aallartilaarnerani pissapput.
Niviarsiaqqat U-18-it juulip qeqqani Ilulissani unammersuassapput nukappiaqqallu U-18-it Sisimiuni juulip naanerani unammersuassallutik.
Arnat inersimasut pissartanngorniunnerat augustimi sapaatip akunnera siulleq Sisimiuni pissaaq.
