Klubbimi siulittaasoq: GM tikeraaqattaannikkut pisinnaagaluarpoq
Arsaannermi GM-ip taamaatiinnarneqarnera Nagdlúnguup akuersaarumanngilaa.
Klubbimi siulittaasoq Lena Ravn Davidsen kissaammersimaarpoq KAK-lu kajumissaarpaa GM-ip taamaatinneqarnera eqqarsaatigeqqequllugu. Nalunaarulli ippassaq atuutilersoq tunngavigalugu GM-ip qanoq pisinnaanera KAK takujuminaatsippaa.
GM taamaatiinnarneqartoq KAK marlunngornermi unnukkut nalunaarpoq. Nalunaarut Nagdlúnguarmiut nukillaajallaatigaat tassami GM-mik aaqqissuinissamut piareersaatit ingerlalluareermata.
AAMMA ATUARUK Arsaannermi GM taamaatinneqarpoq
- Klubbit tusarniaqqaarnagit KAKp aalajangersimanera akuerisinnaanngilarpt. Taamaattumik KAKmut allagaqarpugut unitsitsiinnarani periarfissanik allanik ujartuinissaq kaammattuutigalugu, Lena Ravn Davidsen oqarpoq.
Pilersaarutit malillugit iligiit arfineq pingasut Ilulissani GM-p naggataarneqarnissaanut annguttussaagaluarput. Tamannalu sioqqullugu anngunniuttoqartussaalluni. Aaqqiissutaasinnaasutut unammersuariaaseq maannamut misilinneqarnikuunngitsoq Nagdlúnguup siunnersuutigaa.
- Isumaliutigineqarsinnaavoq tikeraaqattaannikkut GM-rtoqarsinnaanera. Assersuutigalugu illoqarfiit sanileriit klubbii imminnut tikeraaqataassinnaapput naggataatigullu nunap immikkoortuani allami ajugaasut unammillugit, Lena Ravn Davidsen siunnersuuteqarpoq.
KAK eqqarsarpoq
Nagdlúnguup siunnersuutaa KAKp siulittaasuanut Finn Meinelimut KNRip saqqummiuppaa.
- Malittarisassat nutaat ippassaq aatsaat atuutilerput taakkulu tunngavigalugit sunik periarfissaqarnersoq misissussavarput, Finn Meinel oqarpoq.
- Kisianni tikeraaqattaalluni unammisoqassappat misissorneqartussat ilagaat piffissamik atuinissaq aammalu dommerit immaqa arlaleriarlutik aallaqqasarnissaat. Mattussivinnianngilanga, kisianni periarfissat suunersut siulersuisuni eqqartortariaqassavarput, Finn Meinel oqarpoq.
Lena Ravn Davidsenip suli paasisinnaanngilaa sooq GM taamaatiinnarneqarnersoq.
- Suut tamarmi ammariartorput. Inuit Nunatsinnut tikittartut amerliartorput suullu tamarmik Ilulissani ammallutik assersuutigalugu piumasut imerniartarfiliarsinnaallutik. Taamaattumik GM-ip taamaatiinnarneqarnera akuerisinnaanngilara, Lena Ravn Davidsen eqqaaneqareersutut KAK-mut allagaqareersoq oqarpoq.
Finn Meinelip suli oqaatigisnnaanngilaa allaanerusumik GM-rtoqarsinnaanersoq pillugu qaqugu nalunaaruteqarsinnaallutik. Maannamuugallartorli arsaaffimmi nuannannissaq ukiormanna taamaatiinnarneqarpoq.
