KAK arnat arsaattarnerat pillugu: Peqatigiiffiit arlallit peqataannginnissamik nalunaarnerat ajuusaarnarpoq

Peqatajumallutik nalunaarsimasunit qulingiluaasunit tallimat ilaasinnanatik nalunaarsimapput.

Avannaaniit peqatigiiffiit sisamat Nuummiillu peqatigiiffik ataaseq peqataassanatik nalunaarsimapput, taamaattumillu unammisaqataarnerit piviusunngortinniarlugit KAK nutaaliortariaqarsimavoq: B-67 iliginnik ilivitsunik arsaatussaqarsimanngilaq immikkullu arsaattunillu avataaneersunik ilaqarnissaminnut akuerineqartariaqarlutik.

Pissartanngorniunnissaq ingerlaanniaannarlugu taama aaqqiissoqanngila?

- Taamatut oqartoqarsinnaavoq, kisianni pissartanngorniunneq unitsiinnassagutsigu I-69-imiumut billitsititik annaasussaavaat taamaattumik pissartanngorniunnissap ingerlanneqarnissaa aalajangiuttariaqarsimavarput - peqatigiiffiit piffissaq kingulleq peqataasinnaajunnaarnerminnik nalunaaruteqarnerat ajuusaarnarpoq, KAK-mi allaffimmi aqutsisoq, Lars Jørgen Petersen KNR-imut oqarpoq.

AAMMA ATUARUK Arnat isikkamik arsaallutik pissartanngorniunneranni peqatigiiffinnit qulingiluanit tallimat ilaassanatik nalunaarput

Pissartanngorniunnerit ippassaq nangipput, peqataasullu sisamaasut akornanni assigiinnginnerujussuaq ersersinneqaqqippoq. Pissartaasut GSS-ip B-67 15-0-imik ajugaaffigivissorpaa. Unamminerillu aappaanni NÛK Ilulissaneersunut I-69-imut 6-0-imik ajugaalluni.

Ataasinngormat pissartanngorniunnermi unamminerit siullersaanni B-67 NÛK-mut 0-11-mik ajorsavissorpoq, GSS-ilu I-69-imut 7-1-imik ajugaalluni.

Ukiup tulliani pissartanngorniunnermut KAK-mi qanoq iliorniarpisi?

- Massakut siulersuisut qaammatini makkunani eqqartuipput qanoq pilersaarusiotoqassanersoq aamma qanoq pingaarnersiuisoqassanersoq.

Arnat arsartartut peqataanerunissaat anguniarlugu ineriartortinneqarnissaanut maanna sulissuteqarpugut. Massakkorpiaq arnat isikkamik arsarlutik timersortartut amerlisarnissaat ineriartortitsisoqarnissaalu KAK-mit sulissutigaarput, Lars Jørgen Petersen.

- Ataatsimiititaliaq pilersinneqareerpoq, neriuuteqarpugullu allannguinissamik malitseqarumaartoq.

B-67 I-69-imut marlunngornermi nal. 17.00 unammipput, mannalu tikillugu siuttuusut GSS aamma NÛK ullumi unamminermi kingullermi nalunaaqutaq 19 naapissapput.

Arnat pissartanngutivinnerat bronzennanniunnerallu tallimanngorpat KNR-TV-kkut aallakaatinneqassapput.

Ataasinngorpallu – tassa aggustip tallimaani – angutit arsaattartut Sisimiuni Nunatsinni pissartanngornitilissapput.