Arnat isikkamik arsaallutik pissartanngorniunneranni peqatigiiffinnit qulingiluanit tallimat ilaassanatik nalunaarput

Nunatsinni silami arnat arsaallutik pissartanngorniunnerat ippassaq Nuummi aallartippoq.

Kisianni ikittuinnaassapput, Kalaallit Arsaattartut Kattuffianneersoq Lars Jørgen Petersen oqarpoq.

Peqataassallutik nalunaarsimasuniit peqatigiiffiit qulingiluaasuniit tallimat ilaassanatik nalunaarput, pingaartumik aningaasaqarnikkut angalaniarnikkullu ajornartorsiutinik peqquteqarlutik, arsattartut kattufffiat oqaluttuarpoq.

Taamaattumik peqatigiiffiit sisamaannaat peqataassapput – Nuummiit pingasut: NÛK, B-67 aamma GSS Ilulissaniillu ataatsit - I-69.

Taakku akornanni aamma B-67 naammattunik arsaattoqarnissaminik ajornartorsiuteqarpoq. Taamaattumik KAK akuersivoq avataaneersunik ilaatitaqarsinnaasoq, unammisaqattaarnerit peqatigiifinnit sisamanit ilaatitaqarlutik ingerlanneqarsinnaaniassammata.

Tamannali iluaqutaavallaanngilaq. Unammisaqattaarnerit aallarnerlugit unamminermi siullermi B-67 NÛK-mut 0-11-mik ajorsarpoq.  

Unamminerit aappaat aamma assigiinngiffiuvoq, pissartaasut GSS I-69-imut 7-1-imik ajugaammata.

Ullumi GSS B-67-ilu unaammissapput nalunaaqutaq 17 aamma NÛK I-69-ilu nalunaaqutaq 19 Nuup arsaattarfiani unammissallutik.  

Arnat pissartanngutivinnerat bronzennanniunnerallu tallimanngorpat KNR-TV-kkut aallakaatinneqassapput.

Ataasinngorpallu – tassa aggustip tallimaani – angutit arsaattartut Sisimiuni Nunatsinni pissartanngornitilissapput.  

Tassani peqatigiiffiit arfinillit peqataassapput, unamminerillu tamaasa KNRip aallakaatissavai.

Unammisaqattaarnernut peqataasinnaanatik UB-68 Uummannamiit, UB-83 Upernavimmiit, N-48 Ilulissaniit, T-41 Aasianniit aamma IT-79 fra Nuummiit nalunaarput.