KAK: Arctic Winter Gamesimut peqataajartornissatsinnut akissaqanngilagut

Kalaallit Nunaanni Timersoqatigiiffiit Kattuffiata kalaallit timersortartut 74-it Arctic Winter Games 2020-mut marsimi ingerlanneqartussamut peqataajartortillugit, Yukonimut Whitehorsemut aallartissavai.

Futsalertartulli Arctic Winter Games 2018-imi pingasunik kuultinnattut ataatsimillu sølvinnattut peqataassanngillat.

Kalaallit Arsartartut Kattuffiata Arctic Winter Gameertoqarnissaanut inuusuttunut futsalertartunut aningaasassarsisinnaannginnera peqataatitsilinnginneranut pissutaavoq.

- Futsalertartutta kattuffittalu peqataasoqarnissaat piumasarilluinnaraluarpaat, AWG-mulli ukioq manna peqataatitsinissatsinnut aningaasassaqanngilagut, taamaammat uggornarpoq, Kalaallit Arsartartut Kattuffiata siulittaasua, Finn Meinel oqarpoq.

Kalaallit Arsartartut Kattuffiat Kalaallit Nunaanni Timersoqatigiit Kattuffianit ukiumut 3 millionit koruuninik aningaasassarsisarpoq. Taakkulu ukiumut aasaanerani qaammatini pingasuni silami unammisitsinermut atorneqartussiaapput.

Taamaakkaluartorli Kalaallit Arsartartut Kattuffia illup iluani aaqqissuussiniarluni aalajangerpoq. Tamannalu aningaasaqarnermut unammillernartoqartitsivoq.

Finn Meinelip Kalaallit Nunaanni Timersortartut Kattuffianit KAK-mut aningaasaliissutit naammanngissorai.

- Imaappoq aningaasassaqartinngisatsinnik pisoqarpallaarpoq. Tassa taanna Kalaalit Nunaanni Timersortartut Kattuffiata agguaassinissaanut uani patsisaasoq, Finn Meinel oqarpoq.

AAMMA ATUARUK Nunatsinnit Arctic Winter Gamesimut peqataasussat ukioq manna ikinnerussasut

KAK: Tapiissutit marloriaatinngortinneqartariaqarput

Kattuffinnut aalajangersimasumik agguaassisoqartarpoq sinnerilu ilaasortaqassuseq tunngavigalugu tunniunneqartarlutik. Kalaallit Arsartartut Kattuffia piffissami matumani 2700-nik ilaasortaqarpoq.

Kalaallit Nunaanni Timersoqatigiit Kattuffia aningaasaliiffigineqarnerit saniatigut Namminersorlutik Oqartussanit 11,6 millionit koruunit tapiissutigineqartarput. Tamatuma saniatigut Timersoqatigiit Kattuffiat nunatta Danske Spil A/S-imi tipsinit lottonillu kaaviiaartitanit ukioq manna 17,4 millionit koruunit pissarsiarai.

Tassa imaappoq Timersoqatigiit Kattuffiat ukioq manna 29 millionit koruuninik aningaasassarsivoq, taakkulu nunatsinni kattuffinnut assigiinngitsunut agguaanneqartarput.

Arsartartullu Kalaallit Nunaanni Timersoqatigiit Kattuffianit 3 millionit missaanik aningaasaliiffigineqartarpoq.

Arsartartut Kattuffiata siulittaasuata oqarnera naapertorlugu Arsartartut Kattuffianut tapiissutit 6 millioninngortinneqartariaqarput.

- Ukiumut ulluni 161-ini unammititsisarpugut, assersuutigalugu dommerinuinnaq aningaasartuutit ukiumut 600.000 koruunit 700.000 koruunillu akornanniipput. Taamaammat assigiinngitsunut iliuusererusutatsinnut aningaasassarsiniarneq ajornakusoortorujussuuvoq, Finn Meinel oqarpoq.

Kalaallit Arsartartut Kattuffiata futsalertartut Arctic Winter Gamesimut peqataasarnissaat siunissami pingaarnerutinniaruniuk taava tamanna allanut sunniuteqassaaq, siulittaasoq oqarpoq.

- Taamaalilluni futsalimik nunanut allanut unammisartunut sunniuteqarnermi saniatigut inuusuttut holdiinut inersimasullu nunanut allanut unammisartuinut sunniuteqassaaq.

GIF: Uggornarpoq

Kalaallit Nunaanni Timersoqatigiit Kattuffiata sulittaasiata KAK-ip Arctic Winter Gamesimut peqataatitsinnginniarnera uggoraa.

- Soorunami uggornarpoq, taavalu aamma paasinarluni namminneerlutik aalajangigassarivaat uagut kattuffimminngaanniit naalakkersinnaanngilagut, ukununnga unammersuarnernut peqataassuusi, taakku kattuffiit namminneerlutik aalajangersortarpaat, GIF-ip siulittaasua, Nuka Kleemann oqarpoq.

Siulersuisuni siulittaasup aningaasat qanoq agguaanneqartarnissaat nunatsinni kattuffinnit nunap immikoortuani agguataarsimasunit qulingiluanit taasissutigineqarnikuusut oqaatigaa. KAK-p aningaasannannerunissani ataatsimeersuarnermi kingullermi kissaatigaa, tamannali akuerineqanngilaq.