Nunatsinnit Arctic Winter Gamesimut peqataasussat ukioq manna ikinnerussasut

Arctic Winter Games 2020 Canadami Whitehorsemi pisussaq qalliartorpoq. Nunatsinniit unammissutissat assigiinngitsut arfineq pingasut peqataaffigineqassapput. Pisissimillu ooqattaasartartunik nunarput peqataatitaqaqqaassaaq.

Unammiartussat atisassaat Kalaallit Nunaanni Timersoqatigiiffiit Kattuffiannit tiguneqarsimalerput. AWG-riartussammi 74-it taakkulu sungiusaasui aqutsisuilu 20-t qaammat ataaseq qaangiuppat aallakaasussanngorput.

- Kalaallit aallartitat peqataasussat tamarmik 128-t missaaniipput, Kalaallit Nunaanni Timersoqatigiiffiit Kattuffianni pisortaq, Jonas Jensen oqarpoq.

AWG2020-mi timersuutit assigiinngitsut 21-it unammissutigineqassapput. Nunatsinniillu timersuutit arfineq pingasut unammiuaassutigineqassapput. Taakkunannga nutaartaqarpoq.

- Siullerpaamik aamma pisissertartut aamma taakkua peqataatinneqassapput. Pissanganarput aamma taakkua pisissertartunik siornatigut aamma peqataatitsinikuunnginnatta. Taakkua siullerpaamik peqataatittakkagut aamma pissanganartorujussuupput qanoq aamma tigulluarneqarumaarnersut, Jonas Jensen oqarpoq.

Aammali peqataasut ukioq manna ikinnerupput. Futsalertartut peqataaniaratik nalunaarsimammata timersortartut 120-t missaaniittaraluartut maanna 74-iinnaassapput.

Marsilli 15-ianiit 21-ata tungaanut unammiuaartoqarnissaanut piareersarnerit kingulliit ulapputigineqaleruttorput.

- Pisarnertunaasiit qaammatit kingulliit ukua annertuumik piareersarfigaagut, ataqatigiissagassat kingulliit aaqqissuullugit aamma soorlu makku atisat aamma ataqatigiissarlugit angalanissat isumannaallisaanermut tunngasut, billetsit ineqarnissat tassa tamakku assigiinngitsorpassuit massakkut ulapputigaagut allaffitsinni, Jonas Jensen oqarpoq.

Northwest Territoriesimi 2018-imi AWG-toqarmat ujammit 65-it angerlaanneqarput, timersortartulli peqataasussat ukioq manna ikinnerugaluartut ujammit amerlanerusut pissarsiarinissaat kattuffimmiit neriuutigaat.

- Neriuutigaarput kingullermerngarnit aamma amerlanerusunik pissarsinissaq. Taava massakkut ikinneruvugut kisianni nalunngilarput aamma piukkunnartunik amerlasuunik peqarluta, taamaammat ujammit tungaatigut taakkua aamma 60-it tungaatigut aamma inissinnissarput naatsorsuutigaarput, Jonas Jensen oqarpoq.