Kaattut amerliartuinnartut

Nunarsuup inui kaattut ukiut pingajussaat amerleriarsimasut, nalunaarusiami takuneqarsinnaavoq.

Nunarsuarmi inuit inuussutissamik ullut tamaasa amigaateqartut siorna 821 millioniupput - tassa inuit qulingiluaagaangata ataaseq kaattuusarpoq. Tamanna ukiup siuliani 811 millioniusunit sanilliukkaanni qaffariarneruvoq.

Anne Poulsenip naalagaaffiit peqatigiit suliniaqatigiiffianni World Food Programmemeersup, nalunaarusiaq “nikallornarluinnartuunerarpaa”.

- Kaattut amerliartuinnarnerat 2030-nngortinnagu kaattuerunnissamik anguniagaqarneq eqqarsaatigigaanni annilaarnarluinnarpoq, Anne Poulsen oqarpoq.

- Nalunaaqutatut kalerrisaarisartutut angisuutut ippoq, nalunaaquttap sianerluni anguniagaq piviusunngortissagutsigu arlalitsigut iliuuseqartariaqartugut kalerrisaarutigaa.

- Kaattoqarneruleraluttuinnarneranut silap pissusiata allanngoriartornera pissutaasut ilagaat, Anne Poulsen oqarpoq.

Silap pissusiata allanngoriartornera assersuutigalugu naatitsinermut sunniuteqarsinnaavoq. Tamanna aningaasanik isertitassanik annaasaqarnermik inuussutissallu akitsoriartorneranik nassataqartarpoq.

Pingaartumik Afrikami kaattut amerliartorput. Aammali Latinamerikami Asiallu kippasissuani kaattoqaleraluttuinnarpoq.

/ritzau/