Juullimut niuffaffik Berlinimiittoq politiinit inuerutitinneqarpoq
Juullimi niuffaffik Tysklandip illoqarfiisa pingaarnersaanni Berlinimiittoq politiinit assersorneqalerpoq, inuillu qimagussorneqarlutik. Juullimi niuffaffik pineqartoq peqqarniisaarniamit ukiut pingasut matuma siornatigut saassunneqarmat inuit aqqaneq-marluk toqutaapput.
Belrinimi illoqannginnersoq Breitscheidplatz, decembarip ulluisa 18-ianni assilisaq.
Allattoq Ritzau
decembarip 21-at 2019 18:55
Nutserisoq Mads Lynge
Inuit marluk politiinit tigusarineqarsimasut oqaatigineqarpoq, tamannali suli uppernarsarneqanngilaq.
Illoqannginnersaq Breidscheidplatz juullilernerani niuffaffiusoq arfiningornermi unnukkut inuerutitinneqarpoq.
Qaartartuunasorineqartoq politiinit misissorneqartussaasoq, Berlinimi politiit Twitterikkut allaaseraat.
Politeerpassuit ilaatigut qimmilisartut illoqannginnersamiipput, aviisip Berliner Zeitungip allaaseraa.
Oqaluffik Berlinip ilisarnaataasa ilaat Gedächtniskirche illoqannginnersap Breidscheidplatzip nalaaniippoq, tassanilu juullimut niuffaffeqartarluni. Oqaluffimmi juullilernerani tusarnaartitsineq unitsiinnarneqartariaqalerpoq. Aviisip Bildip nittartagaani tamanna atuarneqarsinnaavoq.
Tigusarineqartut marluk Syriameersuusut, Bildip Berliner Zeitungillu allaaseraa, paasissutissalli taakku politiinit suli uppernarsarneqanngillat.
Inuit juullimut niuffaffimmiittut eqqissisimallutik qimaguttut politiit ilisimatitsissutigaat.
Berlinip qiterpasissuani qimuttuitsut unittarfianni Zoologischer Gartenimi angallanneq unitsinneqarallartoq aviisit allaaseraat.
Angutip lastbiilit atorlugit juullimi niuffaffik 2016-imi saassuppaa, inuit aporneqarlutik toqutaasut taamanikkut aqqaneq-marluupput, arlallillu aqqunartiterlutik.
Saassussisoq, Tunisiamiu Anis Amri, Italiamut kingorna qimaavoq, politiiniillu aallaaneqarluni taamanikkut toqutaalluni.
/ritzau/
