Justus Hansen: Aningaasaqarnermut Aatsitassanullu Naalakkersuisoqarfik avinneqartariaqarpoq
Justus Hansen Demokraatit partiianni siulittaasup tulliatut qinerneqarnini nuannaarutigivaa, naak siulittaasutut qinigaanissani neriuutigisimagaluarlugu.
Aningaasaqarnermut Aatsitassanullu Naalakkersuisoqarfik marlunnut avillugu
Maanna Aningaasaqarnermut Aatsitassanullu Naalakkersuisoqarfiup marlunnut avinneqarnissaa sulissutiginialerpaa.
- Aningaasaqarnermut Aatsitassanullu Naalakkersuisoqarfiup ataatsimoortinneqarnerat annertuallaarpoq avissaartinneqartariaqaraluarlutillu, Justus Hansen oqarpoq.
Justus Hansen inatsisartunut ilaasortaavoq taamaattorli kommunalpolitikeritut ilisimaneqarnerulluni.
Kommuneqarfik Sermersuumi borgmesterip tullersortaatut siullertut inissisimagaluarluni demokraatit nutaamik siulittaasumik qinersineranni ippassaq pisumi siulittaasutut qinigaanngitsoorpoq naak tamanna anguniarsimagaluarlugu.
- Soorunami siulittaasunngorusukkaluarpunga kisianni siulittaasup tulliatut qinigaanera nuannaarutigaara, Justus Hansen oqarpoq.
Justus Hansen siulittaasup tulliatut qinigaanermini Aningaasaqarnermut Aatsitassanullu Naalakkersuisoqarfik ullumikkut ataatsimoortut avissaartinneqarnissaat sulissutiginiarpaa, naalakkersuisoqarfiit taakkua Randi Vestgaard Evaldsenip naalakkersuisuuffigilerpai.
- Aningaasaqarnermut Atsitassaqarnermullu Naalakkersuisoqarfik annertoorujussuuvoq, taakkua immikkoortillugit avinneqarsinnaasuuppata naalakkersuisoqarfiup aappa uanga tigusinnaassagaluarpara, Justus Hansen oqarpoq.
Aningaasaqarnermut Aatsitassanullu Naalakkersuisoqarfiup immikkoortunut marlunnut naalakkersuisoqarfinngortinneqarnissaat illuatungiliuttunit kissaatigineqarsimasoq, Justus Hansen oqarpoq.
Aningaasaqarnermut naalakkersuisunngornissamut soqutiginnippoq
Aningaasaqarnermut naalakkersuisunngornissaminik soqutiginnilluni Justus Hansenip siusinnerusukkut oqaatinikuuaa.
Andreas Uldum stresserluni napparsimalluni oktoberimi nalunaaruteqarmat Aningaasaqarnermut aatsitassanullu Naalakkersuisoqarfik Vittus Qujaukitsumut tunniunneqarmat Justus Hansenip pakatsissutigaa
Aningaasaqarnermut Naalakkersuisunngornissani anguniarpaa tamannali aatsaat inatsisartut apriliimi ataatsimiinneranni oqaluuserineqartussaasoq Justus Hansen oqarpoq.
- Aningaasaqarnermut Naalakkersuisoqarfik tigorusukkaluarpara, tamannalu paasinarsiumaarpoq Inatsisartut aprilimi ataatsimiinneranni oqaluuserineqartussaammat, Justus Hansen oqarpoq.
Justus Hansenip Naalakkersuisunngornissaanut demokraatit siulittaasortaavannit tapersorneqassanersoq Justus aperineqarami taanna ima oqarpoq, - Demokraatini siulittaasunngortoq Randi Vestergaard Evaldsen ataqqivara aamma tapersersorpara kiisalu hundrede procentimik ikiortassavara, Justus Hansen Demokraatini siulittaasup tullia taama oqarpoq.