Julie Broberg Aasianni illersornissaqarfimmut misilitsippoq

Julie Broberg Aasianni ilinniarnertuunngorniartilluni Aasianni napparsimmavimmi sakkutuujusussaatitaanermut ilinnialernissamut misilitsikkusulerpoq.

Julie Brobergimmi Illersornissaqarfimmiilernissani takorluugaraa, taamaammat misilitsikkiartornissamut periarfissamik atorluaanissani qularutiginngilaa. Misilitsinneralu ingerlalluarmat Julie Broberg sakkutuujusussaatitaanermik Skive Kasernemi 2020-mi ilinnialerpoq.

Julie Brobergip illoqarfigisaminit sakkutuujusussaatitaanermut misilitsissinnaanini iluaqutigilluinnarsoraa:

- Maani misilitsissinnaanera pitsaanerungaatsiarsoraara, taamaalillunga piffissarujussuaq Danmarkimukarlunga atunngilara, Julie Broberg oqarpoq.

AAMMA ATUARUK Naalakkersuisut sakkutuujusussaatitaanermut misilitsittarnerit unitsikkaat

Illersornissamut ministereqarfiup Naalakkersuisut kissaateqarnerat pissutigalugu nammineq kajumissutsimik sakkutuujusussaatitaanermut 2021-mi misilitsitsinissamik unitsitsinera illersornissamut ministerip, Trine Bramsenip KNR-imut allakkatigut akissuteqarnermini nassuiaatigereeraalu sakkutuujusussaatitaaneq pillugu oqallinneq aallartippoq.

Unitsitsineq pissutigalugu kalaallit inuusuttut nunatsinni misilitsissinnaajunnaarput, Danmarkimullu angalaqqaartariaqalerlutik.

Kalaallinit inuusuttunit taperserneqarluartoq

Kalaallit inuusuttut Illersornissaqarfimmi ilinnialernissaasa ajornannginnerulersinneqarnissaa pissutigalugu sakkutuujusussaatitaanermut misilitsinnerit nammineq illoqarfigisami 2018-imi ingerlanneqartalerput.

Inuusuttullu nunatsinni najugaqartut sakkutuujusussaatitaanermik ilinnialersimasut amerlassusaat kisiisa isiginiaraanni aaqqiissut taanna iluatsilluarsimarpasippoq.

Kalaallit Nunaannit amerlasuut sakkutuujusussaatitaanermut tunngatillugu Illersornissaqarfimmut 2018 tikillugu isumaqatigiissuteqaqataasut nalilerneqarsimasoq, illersornissamut ministereqarfiup KNR-imut mailikkut paasissutissiissutigaa.

AAMMA ATUARUK Sakkutuunngorniarsinnaaneq corona peqqutaalluni aappaagumut kinguartinneqartoq

Nunatsinni sakkutuujusussaatitaanermut misilitsittoqarsinnaalernerata kingornatigut 22-t 2018-imi 15-illu 2019-imi isumaqatigiissuteqarfigineqarput.

Kalaallit inuusuttut Illersornissaqarfimmi ilinnialernissaat isumatsiaasoq Julie Broberg isumaqarpoq. Sakkutuujusussaatitaanermi taassuma misigisaani pitsaanerpaat ilagaat.:

Sakkutooqarfimmiinnik nuannerujussuuvoq. Killissakka misiligarpakka maannalu pissutsit ajornakusoortut iliuuseqarfigisinnaalerlugit maanna nalunngilara. Sakkutuujusussaatitaaleq ataatsimoornermut suleqatigiinnermullu aamma tunngavoq, taamaammat Illersornissaqarfimmi ikinngutigiilluartoqalertarpoq, taamaammat tamanna allanut innersuussutigerusuppara, Julie Broberg oqarpoq.

Inuusuttut ikinnerusut ilinnialertalernissaat ernumassutigigaa

Anna Wangenheimip Naalakkersuisut nunagisami misilitsittoqarsinnaaneranik unitsitsigallartoqarnissaanik kissaateqarnerat inuusuttunik sakkutuunngorusuttunik ikinnerusut ilinnialertoqartalernissaanik tamanna kinguneqarnissaa ernumassutigaa:

- Isumaqarpunga inuusuttorpassuit allarluni misilitsikkiartortarnissaq uniffigissagaat. Aamma nunarsuaq tamakkerlugu tuniluuttoqarnera killiliinernik killilersuinernillu ilaqartoq inuusuttullu Danmarkimukarnissaannut ajornarnerulersitsisoq eqqaamaneqassaaq, Anna Wangenheim oqarpoq.

Aasianneersup, Julie Brobergip Danmarkimukarluni misilitsikkiartorsimassanerluni aamma nalornissutigaa:

- Eqqortumik oqassaguma – immaqa naamik. Illersornissaqarfimmili ilinnialernissaq takorluugariuaannarpara, taamaammat Danmarkimukarnissaq ajornarpallaanngikkaluarpat aallarsimassagaluarpunga, Julie Broberg oqarpoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup kalaallit inuusuttut Illersornissamik ilinnialerusuttut misilitsikkiartorneranni angalanissamik angalanermullu atatillugu aningaasartuutinik akiliunneqarsinnaasut paasissutissiissutigaa. Taamaakkaluartorli Naalakkersuisut aalajangernerat inuusuttunut qularnermik pilersitsisoq nunatsinnilu sakkutuujusussaatitaanermik misilitsittoqarsinnaanerata attatiinnarnissaa pitsaanerussagaluartoq Anna Wangenheim isumaqarpoq:

- Inuusuttunut Illersornissamut suli periarfissaqarnerannik nassuiaasariaqarput. Uanga Naalakkersuisut Illersornissaqarfiullu inuusuttunut qanoq allamik neqerooruteqarsinnaanissamut isumaqatigiissuteqarnissaata tungaanut sakkutuujusussaatitaanermut misilitsinnerit nunatsinni ingerlanneqarsinnaaginnarnissaat kissaatigissagaluarpara, Anna Wangenheim oqarpoq.

Naalakkersuisunit oqaaseqartitsiniarneq suli iluatsinngilaq.