Sakkutuunngorniarsinnaaneq corona peqqutaalluni aappaagumut kinguartinneqartoq
Kalaallit Nunaanni inuusuttut illersornissaqarfiup ataani siunissami sulilernissaminnut kissaateqartut naammagittarlutik utaqqilaartariaqassagunarput.
Sakkutuunngorniarnissamut Kalaallit Nunaanni misilitsinnerit ukiakkut pisussatut pilersaarutigineqaraluartut, coronavirusip ajornartoortitsinera pissutaalluni aappaagumut 2021-mut kinguartinneqartut, Danmarkip illersornissamut ministereqafiata nalunaarutigaa.
Sakkuunngorniarsinnaanissamut misilitsinnerit Aasianni, Sisimiuni, Nuummi Qaqortumilu ilinniarnertuunngorniarfinni ukiaq manna pisussatut pilersaarutigineqaraluarput.
Misilitsinnerilli aappaagu qaammatit siulliit arfinillit iluanni aaqqissuunneqarsinnaanissaat maanna neriuutaavoq.
AAMMA ATUARUK Illersornissaqarfiup misilitsitsiviani
Angutit arnallu inuusuttut sakkutuunngorsinnaanissamut 2019-imi ukiakkut siullerpaamik misilitsipput, illoqarfinni ilinniarnertuunngorniarfeqarfiusuni taamanikkut aamma misilitsittoqarluni.
Sakkutuunut, sakkutuunut imarsiortunut, sakkutuunut timmisartortartunut upalungaarsimanermullu aqutsisoqarfimmut sulisunngorsinnaanissamut misilitsinnerit taamanikkut aaqqissuunneqarput.
Inuusuttut 47-t misilitsipput, 15-illu sakkutuunngorniarsinnaanissamut 2019-imi taamanikkut isumaqatigiissusiorput. Illersornissamut ministereqarfik taama ilisimatitsivoq.
Angutit arnallu 18-it 30-llu akornanni ukiullit silassorissutsimut misilitsinnertalimmik nakorsamillu peqqissutsimik nalilersortinnertalimmik sakkutuunngorniarsinnaapput.
