Illersornissaqarfiup misilitsitsiviani

Illersornissaqarfik Danmarkimi sakkutuujusussaanermut misilitsitsiartorluni ulluni makkunani nunatsinniippoq. Aasianni, Sisimiuni maannalu Nuummi inuusuttut sakkutuujusussaatitaasinnaanerlutik misilitsipput. KNR-ip Nuummi misilitsinnerit malinnaaffigai.

Illersornissaqarfimmit sakkutuut naalagaat, Dennis Rasmussen Nuummi Dronning Ingridip Napparsimmavissuani qulleriiaanni sullermi aggerlutik sakkutuujusussaatitaalersinnaanerlutik misilitsikkiartortussat siulliit naapinnissaannut pissangalluni utaqqivoq.

Sakkutuut naalagaat angalaqataalu Aasianneereerlutillu Sisimiuneereerput.

- Aasiaat nuannarilluarparput, aqqaneq-marluk misilitsipput arfinillillu uagutsinnut isumaqatigiissuteqarlutik. Taava Sisimiut anginerulaarmat aggertussat amerlanerussasoraagut. Sisimiunili killormuuanik nalaataqarpugut. Arfinillit misilitsikkiartorput ataasiinnarlu isumaqatigiissuteqarluni, Dennis Rasmussen oqarpoq.

22-nik ukiulik Ôdâk Olsen Nuummi sakkutuujusussaatitaalersinnaanermut misilitsikkiartortuni siullernut ilaavoq.

Taassuma piffissami sivisuumi misilitsikkusussimanini oqaatigaa.

- Mikisuullungali soqutigisarisarakku. Taava kiisami piffissaqaasalertunga tamaanngarnissannut, Ôdak Olsen oqarpoq.

Taanna piffissami matumani sulerinnginnami misiliinissamut piffissaq naleqquttoq isumaqarpoq.

- Massakkut sulerisuunngilanga, GU-raluarnikuuvunga, imminut unitsinnikuuvunga, Ôdak Olsen oqarpoq illersornissaqarfiullu ilinniakkat neqeroorutigisai soqutigalugit nassuiaatigalugu.

Illersornissaqarfimmi periarfissat

Sakkutuut naalagaata Rasmussenip Ôdak Olsen tikilluaqquaa immersugassarlu immersoqqullugu, tamatuma kingorna Ôdak Olsen ineeqqamut iserluni silassorissutsimut misilitsikkiartorpoq.

Tamatuma utaqqiisaanik sakkutuut naalagaata, Dennis Rasmussenip Illersornissaqarfimmi neqeroorutitik periarfissaasut oqaluttuarai.

- Neqeroorutigisarput tassaavoq illersornissaqarfimmi tunngaviusumik ilinniarneq, taanna Illersornissaqarfiup ilinniarfiinut allanut Illersornissaqarfimmi sulilerusukkaanni ingerlaqqiffissanut aqqutissiisarpoq. Tamanna Danmarkimi imaluunniit sakkutuulluut umiarsuaanni maani Kalaallit Nunaanni aamma angalasartuni ingerlanneqarsinnaavoq, Dennis Rasmussen oqarpoq.

Sakkutuujusussaatitaaneq tunngaviusumik ilinniarfeqarpoq, taannalu soorlu sakkunik ilinniarnermik, sorsuffimmiinnermik, ikiueqqaarnermik ikuallattumillu qamisaanermik ilaqarpoq, qaammatinillu sisamanik sivisussuseqarluni.

Ôdak Olsen ajuusaartoq

Ôdak Olsen akunnermi ataatsimi silassorissutsimik misilitsereerluni anillappoq pissanngarpasillunilu. Peqqissusaalu sakkutuujusussaatitaanissamut naleqqunnersoq nalilertikkiartorlugu maanna nakorsamukalerpoq.

Nakorsaq nalileereerpat ineeqqamut allamut isissaaq sakkutuujusussaatitaasinnaanersorlu nalilerneqassalluni.

Ôdak Olsenili ineeqqamit anillakkami ajuusaarpoq.

- Ingerlalluarneraraluarpaat, kisianni ADHD-qarnera pissutigalugu tigusaanngilanga. ADHD timinniittuuvoq, uanga aqutarinngilara, akueralugu tiguara. Atuarniarpunga, majoriamut qinnuteqarnikuuvunga, Ôdak Olsen oqarpoq.

Danmarkimi sakkutuujusussaatitaalerniaraanni peqqissuunissaq piumasaqaataavoq. Isaruaqartoqarsinnaallunilu tusaasakitsoqarsinnaasoq aamma nakorsaatitortoqarsinnaasoq, sakkutuut naalagaata, Dennis Rasmussenip nassuiaatigaa.

Illersornissaqarfiup nakorsaata misilitsittoq peqqissuunersoq tarnikkullu peqqissuunersoq nalilertarpaa.

- Tassa sakkutuujusussaatitaanerluni misilitsittut kimiiserfigineqarlutik uippakajaartinneqarlutillu sapinnginneraat misilittarparput. Saperaalli nalileraangatsigu unitsillugit ajunnginnerusarpoq, taamaalilluni ajoqusertoqaranilu allanik pisoqassanngilaq, Dennis Rasmussen oqarpoq.

Illersornissaqarfik tulliani Qaqortumiissaaq, inuusuttullu novembarip ulluisa arfernanni misilitsikkiartornissaat piareersimaffigaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat