Juliane Henningsen: Suliarerusutani tamaasa angumerinngikkaluarlugit angusani nuannaarutigai
![](/sites/default/files/styles/image_934x467/public/article_images/juliane_i_folketinget_630_0.jpg?itok=KkwpXmIL)
Folketingemut ilaasortaatitatta marluusut maannakkullu ilaasortaajunnaalersut aappaa, Folketingemi sulisimaneranik nalilersuitipparput, ilaasortanngortussanullu siunnersuutai tusarniarpagut, Nuup katersortarfiata silataani oqaloqatigalutigu Juliane Henningsen qineqqusaarnerup naalernerani IA-p qineqqusaarfiata eqqaani ualimut kaffillernermi ikiuuppoq taamaakaluartoq, folketingemut qinigassanngortittuni 16-usuni sisamat piukkunnarnerutitani taavai.
Qingassanngortittuni piareersarluarsimasutut folketingemilu aallartitassatut piukkunnarnerpaatut taasai tassapput Sara Olsvig IA, Vittus Qujaukitsoq Siumut, Steen Lynge Atassut kiisalu Niels Thomsen Demokratineersoq, Juliane Henningsen oqarpoq.
- Taakkua piareersarluarsimallutik qularatik sassarterput, inuiaqatigiit kiffartuunniarlugit, Juliane oqarpoq. Qinigassanngortittut ilaannut Juliane pakatsivoq, ilai piareersarsimanngillat aamma folketingemi sulineq qanoq ippiarnersoq paasisimanngilaat, taakkununngalu Juliane pakatsivoq.
-Qineqqusaartut ilaat qineqqusaarnerminni folketingemi oqartussaaffigineqanngitsut eqqartortarpaat, Juliane oqarpoq. Juliane Henningsen folketingemi sulinermini iluatsittut eqqaasai tassaapput: kalaallit Danmarkimi najugaqartut nakorsiarnerminni nutserisoqartinneqartarnerat atorunnaarsinniarneqartoq pinngitsoortinneqarpoq, kalaalllit Danmarkimiittut angerlarsimaffeqanngitsut arlaatigullu ajornartorsiuteqartut ornittagaqarnissaat qulakkeerneqarpoq. Immikkut suliniutit aningaasaliissutigineqartut satspuljenik taaneqartartut sipaarfiginiarneqarnerat pinngitsoortinneqarpoq. Eqqartuussiveqarnerup malitseqartinneqarnera annertunerusumik samminerusimasinnaagalualuarlugu Juliane Henningsen oqarpoq.
Taamaakkaluartoq eqqartuussiveqarneq pillugu suliaq, inatsisartuni saqqumiunneqarmat, Kalaallit Nunaanni Naalakkersusut danskillu naalakkersuisuisa suliaraat, kisianni aqqutit allat atorneqarsimasinnaagaluartut Juliane Henningsen isumaqarpoq. Taannali ernumanngilaq, suliaq taanna folketingemi ilaasortanngortussanut ingerlateqqinneqassammat, aamma nalunngilaa qineqqusaarnermi tamanna eqqaaneqarmat. Folketingemut ilaasortanngortussanut Juliane Henningsen siunnersuuteqarpoq.
- Folketingemi sulinermi suliassat ilaat tassanngaannaq takkuttarput, taamattumik folketingemi ilaasortanngortussat marluusut suleqatigiinnisaat oqaloqatigiinnissaat pingaaruteqartoq, - Juliane Henningsen oqarpoq.
- Nunarput qanoq sassartaarutiginiarnerlugu ilaasortat oqaloqatigiittarnissaat pingaaruteqartoq,- Juliane oqarpoq.
Juliane Henningsen Lars Emil Johansenilu folketingemi ilaasortaanerminni oqaloqatigiittarnermikkut sulinertik iluatsinnerpaasartoq Juliaannap oqaatigaa. Juliane Henningsen isumaqarpoq suleqatigiinneq saqqumilaarnerluni pingaarnerusut, suleqatissat siumut mattutereernagit.