Assange unioqqutitsinikkut nammineersinnaajunnaarsinneqartoq
Assangep nammineersinnaajunnaarsitaanerata unitsinneqarnissaa, Naalagaaffiit Peqatigiit misissuititaasa Tuluit Nunaannut Sverigemullu innersuussutigaat. Nunat taakku marluk Assange taarsiivigisariaqaraat misissuititat aamma oqaatigaat, tassami Assangep kiffaanngissuseqarluni angalasinnaajunnaarsissimagaat inerniliukkamikku.
Julian Assange USA-mi inuppassuarnik quarsaartitsivoq, paasissutissanik isertukkanik 100.000-likkaannik saqqummersitsinikuugami. Taamaattoq Ecuadorip aallartitaqarfianit ernumaassutissaqarani anisinnaanissaa ullumi naatsorsuutigineqarpoq.
Naalagaaffiit Peqatigiit misissuititaasa inerniliinerminni Sverige ilaatigut isornartorsiorpaat, isornartorsiuinerilli Sverigemit illuatungilerneqarput, oqarlutik Assange Ecuadorip aallartitaqarfianut nammineq piumassutsiminik 2012-imi ornigussimasoq.
Tuluit ministeriunerunerata David Cameronip ippassaq oqaatigaa Assange aallartitaqarfimmit qimagutissagaluarpat tigusarineqarumaartoq.
