Nunatta Isiginnaartitsiviani aqutsisoq aningaasanut inatsit pillugu: - Ajorluinnarpoq
- Aatsaat taama ajortigisumik inississaagut, kulturimullu kingunerlussaaq, Nunatta Isiginnaartitsiviani aqutsisoq Susanne Andreasen oqarpoq.
Aningaasanut aappaagumut inatsit malillugu Nunatta Isiginnaartitsisarfianut aningaasaliissutaasussat 10 procentimik ikinnerussapput.
- Namminersorlutik Oqartussat siunertaat kiisa nalunarsivoq. Isiginnaartitsisarfik arriitsumik atorunnaarsinniarnerpaat? Tassami aningaasanik tapiisarunnaariartuinnarput. Imaluunniit suli isumaqarpat isiginnaartitsisarneq kulturilu aallutissallugit pingaaruteqartut?, aqutsisoq oqarpoq.
Unammiinnavissutut misiginartoq
Isiginnaartitsinerup nunatsinni qanoq pingaartinneqartiginera nalunartoq, pisortap oqaatigaa:
- Unammiinnaavissutut misiginarpoq. Uagut suliagut politikkikkut kissaatigineqarlutik pilersinneqaraluartut ataannarnissarput ilungersuutigiuaannartariaqartarparput.
AAMMA ATUARUK Eqqumiitsuliorneq eqqugaarujussuarpoq
Nunatta Isiginnaartitsisarfiata suliai soorlu Isiginnaartitsisartunngorniarfik, sinerissami angalalluni takutitsinerit kulturikkullu assigiinngitsunik ingerlatsisarnerit naammassiuminaassinnaalissasut Susanne Andreasenip ilanngullugu oqaatigaa. Taamaammat Isiginnaartitsisarfik aningaasaateqarfinnut qinnuteqaqattaartarpoq:
- Ukiumut 60-it missaannik qinnuteqartarpugut. Taamaaliorneq allaffissornikkut suliarujussuuvoq sivisusarlunilu.
Inuiaqatigiinnut ilusileeqataasoq
Inuiaqatigiinnullu kulturi ilusilersueqataasoq, pisortap oqaatigaa:
- Kulturi aliikkusersuineruinnaanngitsoq isumaqarpunga, naak taama isigineqartarajuttaraluarluni. Aamma siunissami inuiaqatigiinnik ilusilersueqataasarpoq. Inunnut aningaasaliineruvoq.
Nunatta Isiginnaartitsisarfiani sulisut arfineq marluussasut aalajangigaavoq. Maanna Isiginnaartitsisarfimmi sulisut tallimaapput.
Taamaattumik allattoqarfimmi sipaarniartoqangaatsiarpoq, illumullu akiliut akisummat qanoq sipaaruteqarnerunissaq nalunarpoq.
- Illumut akiliingaatsiartarpugut tamannali allanngortikkusupparput.
- Taamaammat oqartunga kulturimut kingunerlussaaq. Ikinnernik isiginnaartitsisariaqassaagut, taava immaqa ukiumut ataasiaannaq takutitsisoqassaaq.
