KNR AWG Join Feel Jump KNR-imi
“JOIN FEEL JUMP” tassaavoq Arctic Winter Games 2016-imi oqaasinnaaritinneqartussaq tassungalu KNR ilaavoq. Tassami timersornikkut pisorpassuit piorsarsimassutsikkullu ingerlaneqartussarpassuit tamakkingajallugit Radiokkut, TV-kkut Web-ikkut inuillu attaveqarfiisigut malinnaaffigisinnaassavatit.
Meeqqat inuusuttullu 1.700-nik amerlanerusut nunanilu issittormiuararpassuit inuusuttut aallartitaqatitillu Nuummut tikerassapput Arctic Winter Games 2016-imut peqataajartorlutik. Timersuutini 17-ini assigiinngitsuni unammiuaassapput, KNR aqqutigalugu malinnaaffigisinnaassavatit.
AWG Radiomi
KNR Radioa annertuumik timersornikkut ingerlassanik aallakaatitsisarniarpoq. Ullaakkut aallakaatinneqartartoq Nunatta Nipaa ullaat tamaasa ullormut pisussanik aallakaatitsisarniarpoq ullaa tungaani ualikkullu timersornermik aallakaatitsisartut Uju Petersen Finn Nielsenilu toqqaannartumik pisoqarfinniit assigiinngitsuniit aallakaatitsisassapput, inerniliussanik angusanik medaaliannatsisoqartillugulu aamma malinnaatitsisarumaartunik. Kulturikkut aaqqissuisoqarfimmiik kulturikkut pikialaartunik ti-mersornerminngaanniit aallakaatitsisassapput.
AWG KNR TVmi
KNR TV-mi timersuutit assigiinngitsut sisamat angullugit ullormut malinnaaffeqartarsinnaassaatit. Aallakaatitaq siulleq toqqaannartoq aallakaatinneqassaq Qinngutsinni sisoraaserluni ooqqattaasarneq ingerlatsiffimmiit ataasinngorneq marsip arfineq-aappaat. Unnuit tamaasa ullormut pisut katersorlugit tigulaariffigalugit AWG-mi pisunik aftenshowimi malinnaasinnaasassaatit Arctic Winter Gamesertoqarnera tamaat ingerlanneqartartussami.
Arctic Sport Nuuk TV peqatigalugu aallakaatitassiami malinnaasarsinnaavutit KNR2-kkut sapaatip akunnera naallugu.
AWG KNR.gl
KNR.gl live-mi paasisat kingulliit ilanngullugit ullormut timersornikkut pinnguaatininngaanniit takussutissiisoqartassaaq, tusagassiortut aallartitagut isiginnaagassiaaqqanik takutitsisassapput TV-kkut aallakaatitanik tigulaaralutik saniatigullu asserpassuarnik peqataasuniit isiginnaartorpassuarniillu.
Angusat ingerlaavartumik malinnaaffigisinnaassavatit kina sumik pinnannersoq, nunatta illoqarfinni annersaanni susoqarnersoq siammasissumik inuit attaveqarfiisigut nittarsaassivigisarumaarparput.
Radiokkut TV-kkullu illit peqataatikkusuppatsigit. Illit nammineerlutit aamma ikkussuisinnaavutit hashtag una atorlugu #KNRgl Instagrammikkut Twitterikkullu Join os #KNRgl aqqutigalugu.
KNR Radio, KNR TV kiisalu KNR.gl tamakkerlutik soorunami piorsarsimassutsikkut ingerlassanut malinnaatitsiumaarput minnerunngitsumik ammaanersornermiit, naggataarnersiornermiillu.
Ataatsimoortumik ugguna aallakaatitassiassagut malinnaaffigisinnaajuaannassavatit KNR.gl/AWG
Sila pillugu teknikkikkulluunniit ajutoortoqassagaluarpat KNR aallakaatitassanik allannguisinnaavoq.
Paasisaqarnerorusukkuit KNR TV-mi pisortaagallartoq Niels Pavia Lynge attavigisinnaavat, tlf. +299 36 15 00 imaluunniit allallutit npl@knr.gl
