Johan Fleischerip illumi meeraaffiginikuusaani unnuisut innuttaasut qanillugit misigisassaqartarput

Innuttaasunut misigisaqartitsinissaq Airbnb-p aallarteqqaarnerani tunngaviuvoq, nittartagarli ineriartortinneqariarluni illuliorluni aningaasarsiortartunut nutaarsiassaalersimavoq. Airbnb aqqutigalugu Johan Fleischer Nuummi unnuisitsisartuuvoq, takornarissanut attaveqartarnissarluarnissaq pingaaruteqartoq taanna isumaqarpoq.

Allattoq Camilla Egeborg Møller

novembarip 10-at 2024 10:43

Nutserisoq Steve Pedersen Hinrup

Illu sungaartumi matu matummat anori nipaaruppoq. Johan Fleischer iggavimmut 60-ikkorpalaartumut tikilluaqqusilluni iseqqusivoq.

- Ima pisoqaatigisumut iseraangamik amerlasuut piffissamut uterlutik angerlartuusisarput, Johan Fleischer illaatigaluni oqarpoq imermillu qalatsitsinnginnermini kaffisorfinnik ilisivimmit tigusilluni.

Illu Nuup qeqqani inissisimavoq, qatanngutigiillu sisamaasuni marluk 1969-imit meeraanermiilli tamaani angerlarsimaffeqarput. Saniatigullu ataatsimik ataavartumik attartortoqarpoq, ataanilu sinittarfik Airbnb aqqutigalugu attartugassaalluni.

Illu akilersorumallugu Airbnb aqqutigalugu attartortitsisalernissaq siunertaasimavoq. Johan Fleischerilli unnuisartut isumaqartillugit ingerlaannaq paasilerpaa.

Unnuisussat unnukkut takkutikkajunnerusarput, unnuisussallu nerisassaqarniassammata pisiniarfik qaninneq takutinnissaa iliuusissaani siullerpaasarpoq.

- Kingornalu Nuummi illoqarfimmi takornariartittarpakka pisoqatigalugit, illoqarfiup ineriartornera, pinngortitaq oqaluttuarisaanerlu oqaluttuaralugit.

Piffissamut utertuusiffik

Johan Fleischer kaffiuserluni allaffimminut iseqatigivaatigut, assini qalipaateqanngitsuni Nuuk Sermitsiarlu takuneqarsinnaappput. Pappilissat qaleriit atuagarlu Sassuma Arnaanut tunngasoq allaffianiipput, aammalu allaat arferup sarpianik ilusilik.

Illu qangamut utersaarfiuvoq, iigaq naasuarartalik, qulliit kingumut qiviarnartut ilusillu kusanartut. Nuummi najugaqarluni qanorinnersoq Airbnb aqqutigalugu unnuisut unnummut 475 koruuneerlutik misigisinnaavaat, aki taanna hotelimut unnuinerup affaata missaraa.

Airbnb aqqutigalugu ukiumut 15-it missaliorlugit Johan Fleischer unnuisoqartarpoq, unnuinikuusimasullu ilai USA-mit Indiameersullu ulloq manna tikillugu mailikkut attaveqaqatigisarpai.

Siniffissat naammappat?

Nuummi unnuiffissat amerlassusaat pillugit Visit Greenlandip misissuinerani unnuiffissanik pisariaqartitsisoqassamaarnera annertussutsinut pingasunut - tassa takornarissat 2025-mit 2030-mut ukiumut 5, 10 15 procentinik annertusiartornissaat inississugaapput.

Unnuiffissanik amerlanernik sanasoqaqqissanngippat Nuuk september 2027-mi unnuiffissat amerlassusaasa 5 procentiinik amigaateqartoqassaaq, piffik taanna amigaateqannginnerpaaffianiissaaq.

Unnuiffissanik sananissaq piffissatornarsinnaavoq, taamaattumillu piffiit aalajangersimasut unnuiffissanik amigaateqarfiusinnaallutik.

Nuummi inissamik utaqqisuniinneq ukiunik tallimanik sivisussuseqarsinnaasartoq INI-p kisitsisaataasa nutaanersaanni erserpoq. INI nunatsinni attartortitsisartut annersaat ilagaat.

Birgit Leick Norgep kujataata kangisissuani Aningaasaqarnermut instituttimi universitetimi professoriuvoq. Issittumi Airbnb-p innuttaasunut sunniutaa misissornikuuaa.

- Airbnb aqqutigalugu inniminniinikut sumiiffimmi inuuneq soqutigisarikkajuttarpaat piviusunillu misigisaqarusuttarlutik. Assassukkanik tammajuitsunillu sumiiffimmi sanaanik pisisarput illoqarfimmilu neriniartarfinni nerisarlutik, Birgit Leick oqarpoq.

Unnuinikut naapeqqillugit

Johan Fleischer upperiuminaassinnaasunik qangameersunik oqaluttuarneq nuannaraa, takornarissallu Nuuk assiginngisitaartumik takusinnaanerulertaraat isumaqarpoq.

- Takornarissanik angallassisartut paasissutissat pisortatigoortunik oqaluttuartarput, peroriartornertilli qaqutigut oqaluttuarisarpaat. Uangalu tamakku oqaluttuarerusuttarpakka, taamaalillutik oqaluasaanik uanneersunik pissarsiaqartarput.

Sanaartorfiusumi qaartartumik inuusuttunut meerapalaanut ulorianartunik nukappiaraanermini pissarsisimalluni assersuutitut oqaluttuaraa.

Airbnb aqqutigalugu unnuisarfik sinittarfik sipaartumik pisatsersornikuuvoq, pisariaqartitalli tamaasa pigai. Qalipagaq suluppaagaasannguaq qalipaatigeqisoq ilaavoq.

- Nå, unnuisoq kingulleq rødviinnimik uani kuisuugaqarsunavoq, Johan Fleischer qungujuutigaluni tungermut tikkuaavoq.

- Maani unnuisarsimasunik qujanartumik suli attaveqaqateqartarpunga. Europami aasaq kingulleq angalavunga, tassanilu Airbnb aqqutigalugu unnuinikut Norgemeersut, Tjekkiiameersut Bulgariameersullu pulaarpakka, taanna oqarpoq.

Sumiiffimmi unnuisitsisarfiit ingerlalluartut

Attartortitsisartut aalajangersimasut ingerlalluartut, Issittumi Airbnb aqqutigalugu attartortitsineq pillugu misissuinermi misissuisut inerniliipput.

- Attartorfissat minnerit sumiiffiusumit ingerlanneqartut unnuisarfiit angisuuniit nalilerneqarnerup utertitsiffigineqartarnerullu tungaatigut ingerlalluarnerupput. Unnuiartortut piviusunik misigisaqarumallutik sumiiffimmi innuttaasut attaviginiartarpaat, tamannali unnuisarfinni annerni ajornarnerutinneqartarpoq, Birgit Leick oqarpoq.

Johan Fleicher Airbnb aqqutigalugu amerlanerusunik unnuisoqartarumaarluni neriuppoq, illoqarfimmullu pingaarnermut ajoqutigisinnaasai eqqumaffigai.

- Sumiiffiit ornigarneqarpallaartarneri nunarsuarmi ajornartorsiut alliartorpoq, maanilu Nuummi malugisinnaaratarsinnaavarput. Neriuppunga takornariaqarpallaalernissaq kommunemit naalakkersuisunillu isumagineqarsinnaassasoq, taanna oqarpoq.

- Soorunalimi aamma neriuppunga Airbnb ineriartorsinnaassasoq, illut inillu atorneqanngitsut uninngaannannginnerussammata, assiganilli aamma sumiiffiusumi illut pisariaqartinneqartunik peqassasoq.

Eqqarisat allanngoratarsinnaasut

Airbnb niuernitsialaasinnaasoq misissuinerup ersersippaa, kisiannili inuiaqatigiit eqqugaasarput. Taamaattumik nammineq inigisaq qimallugu angalagaanni angerlarsimaffik attartortittarnera piujuartitsinerpaavoq.

- Illut amerlasuut Airbnb aqqutigalugu attartortinneqarpata attartugassat ikinnerulernerata kingunerisaanik illumut akiliutit akitsorsinnaapput, tassanilu innuttaasut akissarsiai malinnaatinneqartanngillat. Taamaattumillu inuit nuuttariaqalerneranik kinguneqarsinnaavoq, eqqamioqatigiinnullu allannguisinnaavoq sumiiffimmilu inuit angerlarsimanngitsutut misigilersinnaasarput, Birgit Leick nassuiaavoq.

Johan Fleischer meeraallunili angerlarsimaffimi saavani assilitinniarluni silamut nittaaqqammisumut aneqataavoq. Akunnaquteqanngitsumik unnuisitsisarnini tulluaraa, unnuisussat tullii Danmarkimeersuupput, taakkulu qaammat ataaseq qaangiuppat tikilluaqqussavai - qaqugukkulluunniilli inniminniisoqarsinnariaannaavoq.

Nutaarsiassami kukkunermik nassaarsimaguit uunga allaffigineqarsinnaavugut.