Jess G. sorsuttuarsinnarpoq
Jess G. Berthelsenip juullimut akissarsisitsinissaq kingumut isornartorsiorpaa. Tusagassiorfinnut nalunaaruteqarluni ataqatigiittoqannginnera isoraa, namminermi isummani malillugu tamanna inuiaqatigiinni kalaallini akissarsiakinnerusunut ajornartorsiortitsimmat. Siunissaq qanoq isikkoqassagaluarpalluunniit, Jess G. Berthelsenip SIK-mut ilaasortat decembarimi akissarsiassaasa juullertinnagu tunniunneqartarnissaat ilungersuutigiinnarniarpaa.
Aningaasaqarnermut naalakkersuisoq Maliina Abelsen, decembarimi akissarsiassat juullertinnagu tunniunneqarnissaannut peqataarusunnginnini pillugu Jess G. Berthelsenimit naveersippoq. Abelsen akileraarutinik appaanissamik siunnersuutini, Jess G. Berthelsen malillugu akissarsiakinnerusunut ilaqutaasussaanngitsoq pillugu aamma uumisaarneqarpoq.
Naalakkersuisooqatigiit ataatsimut isigalugit Kalaallit Nunaannillu aqutsisinnaassuseqarnerat nalorninarsivoq, Jess G. Berthelsenilu nammineq isumaqarpoq Nunatsinni qinersisartut meeqqatut pineqarnertik qatsutivissoraat. Sulisartut kattuffiata siulittaasuata oqaatigisaatut, tamanna kingusinnerpaamik juunimi 2012-imi Inatsisartunut qinersisoqalerpat tamanna aalajangiiffigineqassaaq.
Jess G. Berthelsenip kamannini tusartereeramiuk, naggasiutigalugu kikkut tamarmik nuannersumik pilluarnartumillu ukiortaarsiorluarnissaannik kissaappai.