-Naalakkersuisuusimasup ingerlatai nangissuakka, aalisarnermut inatsisissaq, ukiamut saqqummiunneqartussaammat, taanna qimerlortussaassavara salliutillugu, naalakkersuisoq, Nikolaj Jeremiassen, oqarpoq. Nikolaj Jeremiassen oqarpoq.Assi: KNR

Jeremiassenip aalisarnermut inatsisissaq salliutinniarpaa

Pinngortitaq pillugu nunarsuaq tamakkerlugu suliniaqatigiiffik Verdensnaturfonden KNAPK-lu Aalisarnermut piniarnermut nunalerinermullu naalakkersuisunngortumut isumalluarput.

Naalakkersuisunngortup Nikolaj Jeremiassenip aalisarnermut inatsisissaq salliutillugu suliariniarpaa.

- Naalakkersuisooqatigiit isumaqatigiissutaat malillugit ingerlassuunga. Naalakkersuisuusimasup ingerlatai nangissuakka, aalisarnermut inatsisissaq, ukiamut saqqummiunneqartussaammat, taanna qimerlortussaassavara salliutillugu, Aalisarnermut, piniarnermut nunalerinermullu naalakkersuisoq, Siumumeersoq, Nikolaj Jeremiassen oqarpoq.

Aamma atuaruk Jeremiassen naalakkersuisunngorpoq

Aalisarneq nunatsinni inuussutissarsiutini pingaarnerpaavoq suliassallu annertuut pioreersut nanginneqassapput. 

Aalisarnerli piniarnerlu Nikolaj Jeremiassenip inuussutissarsiutitut ilitsoqqussaraa. 18-inik ukioqarluni aalisarneq piniarnerlu inuussutissarsiutigalugu namminersortunngorpoq, taassumallu saniatigut Kangaatsiami kommunalbestyrelsinut ilaasortaanikuulluni.

Aamma atuaruk Jeremiassenip Enoksen neriullualersippaa

Inatsisartunut 2013-imi qinigaavoq naalakkersuisutullu ataasinngormat ivertinneqarluni.

Nikolaj Jeremiassenilu aalisarnermut inuussutissarsiornikkut misilittagaqarluarami aalisarnermut, piniarnermut nunalerinermullu politikkikkut suliaqarluarnissaminik isumalluarpoq.  

- Aalisarneq naqqaninngaanniit aallartinnikuuara; pujortuleeqqamik aalisarneq, tulaassuinnartumik raajarniarneq, tulaassuinnartumik kilisaammik piginneqataaneq, avataani uutiterisumik piginneqataaneq. Taakkua nukissamik annertuumik tunisinikuupput, naalakkersuisoq oqarpoq, nangillunilu:

- Taamaattumik, ingerlatseriaaseq una eqqarsaatigalugu, savaateqarneq tipisiukannereernikuusara. Soorunami atuisut peqatigilluininarlugit ingerlatsiguma isumaqarpunga aarlerinarpallaanngittoq, Nikolaj Jeremiassen oqarpoq.

Aamma atuaruk Krusep siunissami sussanerluni oqaatigisinnaanngilaa

Aalisagartassatut innersuussutigineqartartut malinneqarnerusalernissaat pinngortitaq pillugu nunarsuaq tamakkerlugu suliniaqatigiiffiup, WWF-ip, neriuutigaa.

- Innersuussutigineqartut malinneqarnerusalernissaat siunissarlu ungasinnerusoq isigalugu tamanit iluanaarutigineqarsinnaasut eqqarsaatigineqarnerusalissasut neriuutigaarput, aalisarnermi Kalaallit Nunaanni inuussutissarsiutini pingaarnerpaavoq, WWF-ip Nuummi immikkoortortaqarfiani biologi Kaare Winther Hansen oqarpoq.

Aamma atuaruk Naalakkersuisuusimasup neriorsuutini naammassinngikkai aalisartut isumaqarput

Aalisartut piniartullu kattuffiata, KNAPK-p, naalakkersuisunngortoq, ukiorpassuarnilu suleqatigilluartarsimasartik, isumalluarfigaat.

- Soorunami neriuuteqarfigivarput, aamma Nikolaj nammineerluni kattuffimmut qanittuuvoq attaveqarluartuullunilu. Taanna ingerlatiinnarneqassappat naatsorsuutigivara ajunngittumik tamatta angusaqassalluta, KNAPK-mi siulittaasoq Henrik Sandgreen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat