VIDEO Krusep siunissami sussanerluni oqaatigisinnaanngilaa

Karl Kristian Kruse aalisarnermut naalakkersuisutut inissisimaffini qimallugu ippassaq nalunaarutigaa. Ilaqutariittut inuunermi pisariaqartitat qitornallu peroriartornermini pisariaqartitai pingaartillugit tunuarluni KNR-imut oqarpoq.
Karl Kristian Kruse siulittaasumit Kim Kielsenimit eqitaartorneqarpoq. Assi © : KNR
maajip 24-at 2016 16:38

- Soorunami suliassat akisussaaffillu tigummiara nuannaraara, aamma imaannaanngittortaqaraluartoq, kisianni tassa nammineq inuttut ilaquttakka aallaavigalugit tunuartariaqarninnik qinnuteqarnikuuvunga, Aalisarnermut, piniarnermut nunalerinermullu naalakkersuisuujunnaartoq, Siumumeersoq Karl Kristian Kruse, oqarpoq.

Naalakkersuisutut tunuarniuteqarnissani piffissami sivisuumi eqqarsaatigisimallugu taassuma oqaluttuaraa.

Aamma atuaruk Krusep tunuarnissaa Kielsenip ilisimareersimavaa

- Naalakkersuisutut tunuarniuteqarnissara sivisungaatsiartumik isumaliuutiginikuuara. Aamma taamatut aalajangerneq imaannaanngilaq, kisianni taamaakkaluartoq sulinerup ingerlanerani naatsorsuutigisaminngaannniit ilaqutariinni inissisimaffipput allaaneruvoq. Qitornaqarpugut, taavalu qitornarput uissuussamisut inuussutissarsiornissaminut siunertaqarpoq.

Ernermilu piniartunngornissaminut ikiorneqarnissaminik pisariaqartitsinera, Karl Kristian Krusep pingaartippaa.
Karl-Kristian Kruse naalakkersuisutut atuuffeqarunnaarami Inatsisartuni inisseqqippoq.

Aamma atuaruk Naalakkersuisuusimasup neriorsuutini naammassinngikkai aalisartut isumaqarput

- Inatsisartuni sulinngiffeqarnera atorunnaarpoq. Inatsisartuni sulineq aallartippoq, taamaalluni Inatsisartuni suleqqilernera aallartippoq. 

Ilaqutariilli Niaqornaneersut siunissami qaninnerusumi qanoq pissanersut oqaatigisinnaanngikkallarnerarpaa. 
Taava aamma aalisarnermut piniarnermullu uteqqissanerluni ullumikkut akisinnaanngilaa.

- Tassa taanna oqaatigisinnaanngikkallarpara. Ilaqutaqarpunga, aamma suliffeqarput taakkualu suliffigisaat aallaavigalugit ullut ingerlanerini tulleriiaariumaarpugut qanoq siunissarput isikkoqassanersoq.