Jeremiassen ilinniartitaanerit pillugit apeqquteqaateqarpoq
Kristian Jeremiassenip Siumumeersup Ilinniartitaanermut Naalakkersuisumut § 37 naapertorlugu ilinniartitaaneq pillugu pingasunik apeqquteqaateqarpoq. Ilinniaqqinnissamut atatillugu qinnuteqarlutik qassit itigartitaasimanersut paasisaqarfigerusuppaa. Jeremiassenittaaq ilinniagaqarniarlutik qinnuteqarlutik itigartitaasut ingerlariaqqinnissaat eqqarsaatigalugu sunik neqeroorfigineqartarnersut paaserusuppaa.
Kiisalu Jeremiassenip paaserusuppaa inuusuttut ilinniagaqarniarlutik qinnuteqartut karakterii pisoqaavallaarnerarlugit ilinniagaqarnissaannik itigartitaasarneri ilumoornersoq.
- Naalakkersuisunut apeqquteqaateqarpunga takuniassangakku ukiuni kingullerni qanoq ingerlasoqarsimanera, siunissarlu eqqarsaatigalugu Naalakkersuisut qanoq pilersaaruteqarnersut paaserusukkakku, apeqquteqaateqartoq nassuiaavoq.