FN-imut maalaaruteqarneq Nunatta isigineqarneranut innarliisinnaasoq

Naalakkersuisuusimasummi Naalakkersuisunik tunuliaquteqarani maalaaruteqarsimanerani, tamanna nunanit allanit isigineqarnitsinnut innarliisinnaammat, Jens Wendel-Hansen oqarpoq

Danskit aviisianni Information-imi, marlunngormat allaaserineqarpoq Nunanut allanut Naalakkersuisuusimasoq Vittus Qujaukitsoq nunarput sinnerlugu Danmark Naalagaaffiit Peqatigiinnut maalaarutigisisimagaa. 

Maalaaruteqartoqarsimanera pillugu, pingasunngormat ualikkut Nunanut Allanut Naalakkersuisoq Suka K. Frederiksen tusagassiortunik katersortitsivoq oqaatigalugulu maalaarut Naalakkersuisunit tunuliaquteqanngimmat utertinneqartoq. 

Inuiaqatigiilerinermilli immikkut ilinniarsimasumit tamanna eqqortuliornertut nalilerneqarpoq.

 -  Naalakkersuisut maalaarut utertinneratigut eqqortuliortut isumaqarpunga, Jens Wendel-Hansen taama oqarpoq.

Taama oqaaseqarnerminut tunngavilersuutigaa, Vittus Qujaukitsup Naalakkersuisunut ilisimatsitseqqaarnani pisinnaatitsissummillu peqqaarani  iliuuseqarnera nunatsinnut kingunerlussinnaasoq, inuiaqatigiilerinermik adjunktimit oqaatigineqarpoq.

Vittus Qujaukitsoq aatsaat siullermeerluni Naalakkersuisunut ilisimatitsiqqaarani iliuuseqanngilaq. Decembarip qaammataani, Qujaukitsoq danskit Nunatsinnut tunngasunik suleriaasiannik isornartorsiuteqarpoq aviisilu Politiken naapertorlugu Nunarput naalagaaffeqatigiinnit aninissaanik amerikamiullu Pituffimmiit anisinnissaanik sioorasaarilluni. 

- Nunanut Allanut Naalakkersuisoq tunuliaqutserneqarani aalajangersimanera pissutigalugu naalakkersuisut akerlilerlugu saqqummiisariaqalissappata taava nunanut allanut politikkerineqartoq sorpiaanersoq nalornissutigineqalissaaq. Tamannalu nunanut allanut politikkerineqartoq sorpiaanersoq nalornilersitsisinnaavoq, tamannalu  naggataatigut ulorianarluinnarsinnaalluni.