Naalagaaffiit Peqatigiinnut maalaarutit uitsatigineqartut
Nunatta Danmark Naalagaaffiit Peqatigiit ataanni sullissivinnut inuttut pisinnaatitaaffinnik unioqqutitsisoqarsimaneranik maalaarutinik suliaqarfiusunut assigiinngitsunut pingasunut maalaarutigaa.
Naalakkersuisulli taamatut maalaaruteqarnermi tunuliaqutaasimanersut nalornissutigineqarpoq, maalaarutinik nassiussisoq soraarsitaareersimammat maalaaruteqartoqarnissaanillu Inatsisartut aalajangiisimarpasinngimmata peqateqarani taamaaliorsimasinnaammat.
Pineqartorlu tassaavoq nunanut allanut naalakkersuisuusimasoq Vittus Qujaukitsoq.
Qujaukitsup KNR-imut oqaatigaa Naalagaaffiit Peqatigiinnut maalaaruteqarnissamik sioorasaarut danskit nunanut allanut ministeriannut Kristian Jensenimut 2016-imi oktobarip 24-ani allakkani saqqummiunneqareersimammat, maalaarutinik Naalagaaffiit Peqatigiinnut apriilip qaammataani nassiussinissaminut piginnaatinneqarsimalluni.
AAMMA ATUARUK Nunarput Danmark pillugu maalaaruteqartoq
Qujaukitsoq: Sioorasaarineq Inatsisartunit taperserneqarpoq
Nunanut allanut ministerip Nuummi novembarip 17-ani ataatsimeeqatigineqarnerani taamatut sioorasaarisoqarnera aamma eqqartoqarneqarpoq. Taamaammat Qujaukitsoq isumaqarpoq maalaarutit Nunarput sinnerlugu nassiunnissaannut piginnaatinneqarluni:
- Naalakkersuisuni kingornalu aamma ataatsimiititaliami (Inatsisartut nunanut allanut sillimaniarnermullu ataatsimiititaliaat, aaqq.) tunuliaquserneqarnera qulakkeeqqaarpara, Qujaukitsoq KNR-imut taama oqarpoq.
Naalagaaffiit Peqatigiinnut maalaarummik nassiussisimanerit pillugu ataatsimiititaliaq ilisimatinneqarpa?
- Soorlu oqaatigereeriga, danskit nunanut allanut ministererisimasaannut allakkat oqaluuserineqareerput, aamma Inatsisartut nunanut allanut sillimaniarnermullu ataatsimiititaliaannut tunngatillugu oktobarimi, Qujaukitsoq taama akivoq, Naalakkersuisulli Inatsisartullu isumaqatigiissuteqarfiginerisigut maalaarut nassiussimanerlugu oqaaseqarfigerusunngilaa.
Justus Hansen isumasiuinissamut aggersaasoq
Demokraatit Inatsisartut nunanut allanut sillimaniarnermullu ataatsimiititaliaanni ilaasortaatitaata, Justus Hansenip, KNR-imut oqaatigaa maanna nunanut allanut naalakkersuisuusoq, Suka K. Frederiksen, pisoq pillugu isumasiuinissamut aggersarsimallugu. Maalaarutit Naalagaaffiit Peqatigiinnut nassiunneqarnissaannut ataatsimiititaliaq akuersisimanersoq eqqaamasaqarfiginagu Justus Hansenip ilisimatitsissutigaa.
Ataatsimiititaliami siulittaasup, Inuit Ataqatigiinneersup Ane Hansenip, pisoq Inatsisartut nunanut allanut sillimaniarnermullu ataatsimiititaliaani oqaluuserineqareersinnagu oqaaseqarfigerusunngilaa.
Danskit maanna nunanut allanut ministeriata, Anders Samuelsenip, pisoq oqaaserfigerusunngilaa, maalaarutit ministereqarfiup nammineerluni Naalagaaffiit Peqatigiinnut ingerlateqqissimasai nunanut allanut ministereqarfimmi suli isummerfigineqarsimanngimmata.
Kim Kielsen naapertorlugu, Vittus Qujaukitsup nunanut allanut naalakkersuisuujunnaarsinneqarnera, Qujaukitsup suliani arlalinni peqateqarani iliuuseqartarsimaneranik pissuteqarpoq, naalakkersuisulli siulittaasuata suliat suut pineqarnersut annertunerusumik oqaatiginngilaa. Nunanut allanut pisortaqarfiup pisortaa, Kai Holst Andersen, kingorna aamma soraarsitaavoq.
