Frederiksen: Maalaaruteqarnikkut nunarput iluaquserneqanngilaq
Danskit aviisianni Informationemi ippassaq saqqummersumi allaaserineqarpoq, Vittus Qujaukitsoq Kalaallit Nunaat sinnerlugu Danmark naalagaaffiit peqatigiinnut naammagittaalliuutigisimallugu.
Maalaarulli utertinneqassasoq, nunanut allanut tunngasunut naalakkersuisoq Suka K. Frederiksen ualeq manna ilisimatitsivoq.
Suka K. Frederiksen tusagassiortunik ualilluinnartoq katersuutsitsivoq.
AAMMA ATUARUK Naalakkersuisut maalaarut utertikkaat
Killiffik ilungersunartoq
- Oqaatigisariaqarparput killiffik tulluusimaarutiginartuunngimmat. Aamma kissaatiginaraluarpoq ataatsimoortumik nipi nunatsinniit avammut ingerlanneqartuartussaassasoq, Suka K. Frederiksen katersuurtitsinermi oqarpoq.
Suka K. Frederiksenip oqaatigaa inatsisitigut tunngaviit amigartut, naalakkersuisoqarfiillu akisussaasuusut tusarniarneqarsimanngimmata Naalagaaffiit Peqatigiinnut maalaarutit utertinniarlugit.
AAMMA ATUARUK Vittus peqateqarani maalaarummik nassiussivoq
- Naalakkersuisoqarfiit pingasut avaqqullugit suliaq taanna ingerlanneqarsimavoq. Naalakkersuisoqarfiit tamarmik ilisimasanik pigisaqarput piginnaatitsissutinillu imaqarlutik. Taakkulu piginngikkaanni pisinnaatitsissuteqarnani avammut nalunaarneq taannaavoq aamma paasissutissanik nammineq amigartunik tunngaveqartumik ingerlatsinissamik nalilerneqarsinnaasoq, naalakkersuisoq oqarpoq.
Utertitsisinnaaneq qularutiginngilaat
Naalakkersuisup pingaartillugu oqaluttuaraa maalaarut naalakkersuisoqarfinnit suliassaqarfinnik pineqartuni suliarinnittussaasunit suliarineqarsimanngitsoq.
Naalakkersuisut tusagassiortunik katersortitsinngilaataa tusagassiuutinut nalunaarutigaat, Suka K Frederiksenip maalaarut utertinniaraa. Taamaasiornissamillu periarfissanik ujartuinini Suka K. Frederiksenip katersortitsigami oqaatigaa.
AAMMA ATUARUK Nunarput Danmark pillugu maalaaruteqartoq
Suka K. Frederiksen utertinnginnerani ilumut utertinneqarsinnaanersoq misissoqqaarsimallugu oqaluttuarpoq, taamaammallu taamaaliorsinnaallutik qularutiginagu.
Qujaukitsup maalaarummik nassiussisimanera, naalakkersuisut qanga paasisimaneraat, Suka K. Frederiksen arlaleriarluni aperineqarpoq.
Maalaarummi apriilip arferngani ullulerneqarsimavoq, utertitsinissarlu maajip ulluisa 16-ani nalunaarutigineqarluni.
Kisianni tassa Suka K. Frederiksenip qanga paasisaqarsimanerlutik akisinnaanngilaa, erseqqissaatigaluguli utertinneqarnissaa pingaarnerpaajusoq.