Jens NapãtôK´ katsorsartereernerup kingorna politikkikkut sulileqqinniartoq

Naleqqameersoq Jens NapãtôK' sulileqqikkusuppoq. Siullertut Avannaata Kommuniani kommunalbestyretut suliniarpoq, Inatsisartunili sulinngikkallarnissani aalajangiuteqqavaa.  

Imigassamik atornerluinermut maanna Allorfimmi katsorsartippoq, ilaqutariittullu katsorsarneqarnertik maajip ulluisa 27-ta tungaanut ingerlavoq, kingornalu tamanna nanginneqassaaq, taamaalereerpallu politikkikkut sulinini nanginniarlugu.

- Ulluinnarni inuunitsinnut utersaariartorneq efterbehandling ilutigalugu ingerlattussaavarput, tassungalu tunngatillugu isumasioqateqareerluta kommunalbestyrelsemi aallaqqaammut sulilernissara ingerlanniarlugu siunnerfigaara. Inatsisartuni sulinngiffeqarallarnera ingerlaannarallassasoq maannamut siunnerfigigallarparput. Kingusinnerusukkut inatsisartuni sulileqqinnissara naatsorsuutigilluinnarpara, taanna oqarpoq.

AAMMA ATUARUK Jens Napãtôk Inatsisartunit sulinngiffeqarumasoq

Jens Napãtôp imigassartorsimalluni aapparisaminik sioorasaarineranut videoliaq inuit attaveqaqatigiittarfiini siammarterneqareersorlu, politikkikkut qinigaaffinni marlunnit taakkunanit apriilip ulluisa 27-annili sulinngiffeqalerpoq.

Videoliami inuit pingasut inimiittut takutinneqarpoq. Taakkunannga marluk tassaapput Jens NapãtôK' taassumalu inooqataa. Napãtôp inooqataa natermi nalavoq, Napãtôllu sequtserniarlugu siorasaarpaa.

Inatsisartuni ilaasortartaat ataatsimeerngaanngitsiartullu video taanna inuit attaveqaqatigiittarfianni weekendiugaa ingerlaartinneqarpoq. Aningaasaqarnermut Akileraartarnermullu ataatsimiititaliami pingaarutilimmik inissisimasumi, Jens NapãtôK´ siulittaasunngortinniarneqarpoq, tamannalu peqqutaalluni illuatungiliuttut Inatsisartut ataatsimiittarfianit akerliussutsimik takutitsillutik aniinarput.

AAMMA ATUARUK Siumup Jens Napaattooq politiinut unnerluutigigaa

Jens NapãtôK' Allorfimmi kingorna katsorsartilerpoq, katsorsartinninilu pissarsiaqaateqarfigilluarsimallugu nammineq allaaseralugu:

- Allorfimmi katsorsartinnerput pissarsinaqaaq aammalu meeraanermiit inersimasunngornermut aqqusaarsimasat suliarisimanngisat ilisimanngisatsinnik  annertoorujussuarmik ulluinnatsinnut kalluaasarput maluginiartakkavut takusinnaasimanngisarpassuagut katsorsartinnitsinni puttallakaalersut timitarsisagut aaqqiiffigisariaqarluinnartut suliaraavut, Jens NapãtôK' allappoq.

Naleqqameersoq marloqiusamik qinerneqarpoq. Tassa Inatsisartunut kommunalbestyrelsemilu Avannaata Kommuniani qinigaammat.