Jens Napãtôĸ ataatsimiititaliani silulittaasuujunnaartoq
Jens Napãtôk Inatsisartuni aningaasaqarnermut akileraartarnermullu ataatsimiititaliami siulittaasuujunnaarsinneqarpoq. Aalisarnermut piniarnermullu ataatsimiititaliamilu siulittaasuujunnaarluni.
sermitsiaq.ag taama allappoq.
Tamanna Naalakkersuisoqatigiit Inatsisartuni gruppiata siulittaasoqarfimmut immikkut ittumik qinnutigereeraalu, Inatsisartut matoqqasumik maajip pingajuani ataatsimiinnerminni aalajangerpaat.
AAMMA ATUARUK Siumup Jens Napaattooq politiinut unnerluutigigaa
Jens Napãtôk ataasinngornermi apriilip 26-iani Inatsisartunngortinneqartuni ataatsimeerngaarnermi pingaarutilinni siulittaasunngortinneqarpoq.
Tamanna eqqissiviilliortitsivoq, tassami Siumut Demokraatillu ataatsimiittarfimmiit animmata. Tamatumani video Jens Napãtôk aappaatalu meerartaqarlutik angerlarsimaffianni sapaatit akunnerata naanerani pissutsinik takutitsisoq - Facebookikkut siammarterneqartoq pissutaavoq.
IA aalisarnermut ataatsimiititaliami siulittaasuutitaqalersoq
Videoliami inuit pingasut inimiittut takutinneqarput. Taakkunannga marluk tassaapput Jens Napãtôk taassumalu inooqataa. Napãtôp inooqataa natermi nalavoq, Napãtôllu sequtserniarlugu siorasaarpaa.
Taamaattoqareersoq Jens Napãtôk sulinngiffeqarnissaminik qinnuteqarpoq. Jens Napãtôk sulinngiffeqareerluni uterpat siulittasunngortinneqassanngilaq.
AAMMA ATUARUK Jens Napãtôk Inatsisartunit sulinngiffeqarumasoq
sermitsiaq.ag-mut Jens Napãtôk ima oqarpoq:
- Tamanna pissusissaminiilluinnartoq isumaqarpunga. Aamma nalugakku qanoq sivisutigisumik napparsimallunga sulinngiffeqassanersunga. Aappara tapersersorniarpara, aamma katsorsartinnissarput pingaartitanni siulliupput.
Aningaasaqarnermut akileraartarnermulu ataatsimiititaliami Paneeraq Olsen (N) siulittaasunngorpoq.
Aalisarnermut piniarnermullu ataatsimiititaliami Hans Aronsen (IA) siulittaasunngorpoq.
Ataatsimiititaliani pingaaruteqartuni Naleraq siulittaasuutitaqarnissaralua Jens Napãtôp sulinngiffeqanngikkallarneranit annaaneqarput.
Jens Napãtôk sulinngiffeqareeruni Inatsisartuni tikilluaqqusaanersoq Naalakkersuisut siulittaasortaavat, Múte B. Egede, KNR-imit aperaarput.
Tamanna oqaaseqarfigerusunngilaa.