Jens-Frederik Nielsenip Nivi Olsenip tunuarnera ugguarigaa

Nivi Olsen Ilinniartitaanermut, Kultureqarnermut Timersornermut Ilageeqarnermullu naalakkersuisutut tunuarluni marlunngornermi nalunaarutigaa.

Tamannalu naalakkersuisut siulittaasuata Jens-Frederik Nielsenip uggoralugu KNR-imut oqaatigaa:

- Ugguarigaluarlugu soorunami ataqqisariaqarpara, Jens-Frederik Nielsen oqarpoq.

Nivi Olsenillu naalakkersuisuunermini suliat aallartisarsimasai maannakkut naammassiartuaarneqassasut taassuma ilanngullugu aamma oqaatigaa.

Nivi Olsenip akisussaaffigisimasai tassa Ilinniartitaaneq, Kultureqarneq, Timersorneq Ilageeqarnerlu, Avatangiisinut, Pinngortitamut Nukissiuutinut Ilisimatusarnermullu naalakkersuisup Jørgen Rosbachip akisussaaffigigallassavai.

- Tassa suleriaaseq maleqqissaarlugu pissooq maannakkut susassaqarfiit taakkua akisussaaffiit allaniit tiguneqarallarput nutaanik ivertitsinnginnitsinni, Jens-Frederik Nielsen oqarpoq.

Atassutip naalakkersuisoqatigiinniikkunnaarnera qisuariarfigigaa

Atassut naalakkersuisoqatigiinnit anissalluni aamma ippassaq ataasinngornermi unnukkut nalunaarutigaat.

Tassani Nivi Olsenip tunuartariaqarneranik piumasaqaateqarnertik naalakkersuisoqatigiinnit tusarneqarsimannginnera tunngavilersuutigaat.

Atassutillu naalakkersuisoqatigiinnit aniniarluni aalajangernera Jens-Frederik Nielsenip aamma uggoraa:

- Soorunami ugguanngitsuunngilanga, taamatut paaseriataarlugu Atassut aalajangersimasoq naalakkersuisoqataajunnaarniarluni taanna uggornartuuvoq kisianni soorunami naalakkersuisuni suliagut nangittariaqarpagut, taanna oqarpoq.

Politikkikkut ulluni kingullerni arlalinnik pisoqaqattaaraluartoq, illuatungiliuttuugaluaraanni naalakkersuisoqatigiinniikkaluaraanniluunniit sullissinermi innuttaasut qitiutinneqarnissaat naalakkersuisut siulittaasuata neriuutigalugu oqaatigaa:

- Tassami politikkiuvoq aamma politikkip silarsuaani allanngortoqartarpoq taannalu maannakkut aqqusaarparput, isumaqarpunga qitiutittariaqaripput sullitagut innuttaasut taakkua naalakkersuisoqatigiiugutta illuatungiliukkuttaluunniit taanna neriuppunga malinneqarumaartoq, Jens-Frederik Nielsen oqarpoq.