Jens-Erik Kirkegaard tunuarpoq

Jens-Erik Kirkegaardip aalajangernini Facebookimini saqqummiuppaa. Sermitsiaq.ag.taama allappoq.

-Qujarusuppunga maana aamma. Nuliannut, ilaquttannut tapersersuinikunullu, qinikkatut inuiaqatigiit kiffartuunnissaanut periarfissaqarsimagama.

Taama allalluni naqissusiivoq:

-Inatsisartunut qinigassanngortissanngilaga. Ilaquttat suliffeqarnerlu aallukkusukkakkit.

Jens-Erik Kirkegaardip aalajangiussani KNR-imut ima nassuiarpaa:

 - Nuna tamakkerlugu politikeriulluni ilaqutaqarluni uannut sakkortusimavoq taamaammat uninnissara aalajangiuppara ilaqutaqarnikkut suliffeqarnikkullu aallusserusukkama.

Jens-Erik Kirkegaard Inatsisartunut 2013-imi qinigaaqqaarpoq, aatsitassanullu naalakkersuisunngorluni.

Naalakkersuisuunerminilu uranimut aatsitassanullu radioaktiviusunik attueqqusinnginnerup atorunnaarsinneqarnissaa siunnersuutigaa.

Tamannalu suli ingerlanneqarmat, siunissamilu ineriartornermut nunatsinnilu suliffissaqarnerulernermut aqqutaalluarsinnaammat politikerip siunnersuutigisimasani iluarisimaarpaa.

- Ukioq manna Torontomi aatsitassarsiornermi saqqummersitsivissuarmiikkatta pingaarnertut suliniut nuantsinniit saqqummiunneqartoq tassaavoq Kuannersuarni suliniut, taanna 2013-imi unittuunngujoortoq aatsitassanut naalakkersuisuunerma nalaani ingerlaqqinnissaa qulakkeerparput taamaalillunilu nunatsinni suliffeqarnikkut aningaasarsiornikkullu iluaqutaaratarsinnaanera aqqutissiullugu, Jens-Erik Kirkegaard taama oqarpoq.

Taanna 2014-imi Inatsisartunut qinersinermi qinigaanngilaq, sinniisutulli ilaasortanngorluni.

Qinigaaffimmi matumani Jens-Erik Kirkegaard Siumukkunni politikkikkut oqaaseqartartuuvoq Sanaartornermullu ataatsimiititaliami ilaasortaalluni.