Jens-Erik Kirkegaard: Ernumassutissaqanngilanga
![](/sites/default/files/styles/image_934x467/public/article_images/jens-erik_kirkegaard_0.jpg?itok=V5mw_x6M)
Aatsitassanut naalakkersuisutut tunuaqqammersup Jens-Erik Kirkegaardip pasinarsaarneqartutut misigisimagami erseqqissaassuteqarnissaq pisariaqartissimallugu tusagassiutinut ima allappoq:
- Pisussaaffimma sinaakkutaasut iluani sulivunga, naalakkersuisutut atorfinni akiligassaqanngilanga, aamma naafferaanikuunngilanga.
Taasuma naalakkersuisoqarfinni atornerluisoqartarsimaneranik misissuineq ingerlasoq ernumanartortaqartinngilaa.
- Misissuineq massakkut pisoq tikilluaqqungaarpara, Jens-Erik Kirkegaard KNRimut oqarpoq.
Aleqa qisuariarfigigaat
Ullaaq Nick Nielseni aamma pasinarsarneqarsimanini qisuariarfigaa atornerluisimannginnini uppernarsarlugu. Taassuma naalakkersuisoqarfigisimasani misissuitissimavaa imalu allagarsisimalluni:
- Nick Nielsenip nunatta karsianik kassekreditut atuisimannginnera, nunatta karsianut akiitsoqannginnera aammalu aningaasaliissutigineqartut iluanni angalasarsimanera Naalakkersuisoqarfiup uppernarsarpaa.
Nick Nielsenillu uppernarsaanini ima oqaasertalerpaa:
- Taamaammat aningaasanik assinganik atuisarsimasinnaanitsinnik Aleqap oqalunnera ilumoortortaqanngilaq.
Pasinarsaasoq
Aleqa Hammondip Nunatta karsianik atornerluisimanerata kingorna naalakkersuisut sisamat atorfimminnit tunuarput. Tamannalu naalakkersuisooqatigiit uppisinneqarneranik kinguneqarpoq. Pisullu kingorna Aleqa Hammond ima allappoq:
- Misissorneqartussanngoramik qimarratilerput. Misissuinerup inerneranik takusaqarusunngitsut amerlaqaat.