Jens Bjerge Hawaiimi Ironman VM-imi unammeqataavoq
Arpattartoq Jens Bjerge Hawaiimi Ironmanimik VM-erluni unamminermi arpalluni, sikkilerluni nalunnguarlunilu akunnerit aqqanillit minutsit 54-it sekundillu 40-t atorpai, unammeqataasunit 2300-sunit normu 1347-nngorluni.
50-nik ukiulik Jens Bjerge kalaallini siullersaalluni nunarsuaq tamakkerlugu timersuummik ilungersornartumi Ironmanimi pissartanngorniunnermi peqataavoq.
Nunarsuaq tamakkerlugu Ironmanimi unammeqataanissamut piumasaqaataasoq tassaavoq Ironmanimi unamminermi allami peqataasimanissaq, Jens Bjergelu taamaaliorpoq Københavnini aggustip qaammataani Københavnimi Ironmaninik unammeqataagaami.
Timersuutini unammeriaatsit ilungersunarnerit ilaat Ironman Hawaiimi 1977-imi timersuutigineqartalerpoq, Hawaiimi aamma nunarsuaq tamakkerlugu pissartanngorniuttoqartarluni.
Ironman timersuutini ilungersunarnerit ilaannut timersoriaatsimut triatlonimut assinguvoq, Ironmanernermi 3800 meterisut isorartutigisumik nalunnguartoqartarpoq, 180 kilometerisut isorartutigisumik sikkilertoqartarluni kiisalu 42.195 kilometerisut isorartutigisumik arpattoqartarluni. Tassalu naggataatigut marathonerluni arpattoqartarpoq.
