Jens B. pinngitsaaliisarnerup akiorniarneqarnerata killiffianik ujartuivoq

Pinngitsaaliisarnerup akiorniarneqarnissaanut immikkut suliniarfittut 2014-imi ukioritinneqartussap qanoq ingerlanneqarsinnaaneranut Demokraatit arlalinnik siunnersuutissaqarput, Demokraatilli siulittaasuata Jens B. Frederiksenip ukioritinneqartussap pilersaarusiorneqarnerata killiffia suliniutissallu suut ingerlanneqartussatut naatsorsuutigineqarnersut Naalakkersuisunut § 37 naapertorlugu apeqquteqaatigaa.

Demokraatit ilaatigut siunnersuutigaat pinngitsaalineqarsimasut pinngitsaaleriarneqarsimasulluunniit sianerfigisinnaasaannik oqarasuaammik pilersitsisoqassasoq – ulloq unnuarlu ammasartussamik– pinerluffigineqartut siunnersortiffigisinnaasaannik ilitsersorneqarfigisinnaasaannillu.

- Siunnersuusioratta uagut nammineq takorloorparput, ukiumi suliniarfimmi isummanik allanngortitsiniutaasinnaasut paasititsiniaanerit annertuut,  ilaatigut TV-mi naatsuliat, radiomi TV-milu aallakaatitassiat kiisalu innuttaasunik ataatsimiititsinerit aqqutigalugit ingerlanneqarsinnaasut.

Tarnip pissusaanut immikkut ilisimasallit, politiit, nakorsat, pinngitsaalineqarnikuusimasut, pinngitsaalineqarsimasunut qanigisaasut allallu oqallinnermi tunngavissanik saqqummiisitittarlugit, Jens B. Frederiksen § 37 naapertorlugu apeqquteqaatiminut atatillugu taama allappoq.

Qaammarsaanerup siuarsassavaa angutit paasinninnerunissaat pinngitsaalineqartut qanigisaasullu qanoq sunnerneqartarnerannut. Peqataanik aamma qaammarsaanermi pinngitsaaliisarnerup paquminartuunera ammasumik eqqartorneqarsinnaavoq, pinngitsaalineqarsimasut sassarnissaminnut sapiinneruleqqullugit.

Jens B. Frederiksenittaaq pinngitsaaliisoqartarnerata akiorniarneqarnissaa pimoorulluinnarneqartariaqarpaa, ilaatigut 2012-imi pinngitsaaliinerit pinngitsaaleeriarnerillu 134-t nalunaarutigineqarsimasut innersuussutigalugit. 2010-mi kisitsit suli qaffasinneruvoq, taamani 159-iusimallutik.

Nunanut allanut uagutsinnut assersuuttakkatsinnut naleqqiullugu kinguaassiutitigut kanngutsaattuliornerit nunami maani quarsaannaannartumik amerlapput. Innuttaasut 10.000-likkuutaat tunngavigalugit Savalimmiuni 2005-mi tallimat nalunaarutigineqarput kinguaassiutitigut kanngutsaattuliorsimasutut. Danmarkimi sisamat. Kalaallit Nunaannilu 66-it.