Jens B. Frederiksen: Ulloq unnuarlu piareersimasuutitaqarumaarpugut
24/7-imik taallugu aaqqissuussineq pissutigalugu qulimiguullit inunnik angallassinermut atorneqarsinnaassanngillat.
Nunatsinni ujaasisarneq annaassiniartarnerlu pillugu Danmarkip Nunattalu akornanni isumaqatigiissut massakkutut isikkoqartillugu taamaammat ingerlaqqissanngilaq:
- Nalunaaqutaq kaajallallugu piareersimasoqassappat, taava qulimiguullit soorunami allamut atorneqarsinnaassanngillat. Taammaammat pingaaruteqartorujussuuvoq immikkoornissaat. Annaassiniarnermut tunngatillugu, Danmarkip tamanna suli akisussaaffigivaa, taamaammat pingaartissimavarput Danmarkimit kisimi aningaasaliiffigineqassasoq, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.
Suleqatigiissitaliat Kalaallit Nunaata qulimiguulinnik pisariaqartitsinera pillugu qulaajaasut tunuliaqutaralugit aalajangiisoqarpoq. Nunatsinni ujaasisarneq annaassiniartarnerlu pillugu isumaqatigiissut maanna atuuttoq aappaagu januaarip aallaqqataani atorunnaartussaavoq, Air Greenlandillu qulimiguuliutai S-61-it ilaatigut atorunnaartussaallutik.
Jens B. Frederiksenip oqaatigaa Naalagaaffeqatigiit ukioq manna aggustimi ataatsimiinneranni tamanna pillugu aalajangiisoqarsimasoq.
