Jens B. Dohalialersoq
Silap pissusaanut tunngatillugu naalakkersuunerit ataatsimiinnissaanni nunarsuarmioqatigiit nunarsuup kissakkiartornerata gradit marluk ataaniinnissaanik anguniagaqarnissaannut aalajangiinissaq pingaarnertut anguniarneqarpoq. Silap pissusaanik illersuiniartunut suliassaq imaannaangitsuussaaq. Silammi pissusaanut tunngatillugu naalakkersuisuunerit ukiut marlussuit matuma siorna Danmarkimi ataatsimiimmata tamanna angusaqarfiunngitsoorpoq, Qatarimilu ajornannginnerusussatut isikkoqarani.
-Kalaallit Nunaata kissannera agguaqatigiissitsinermit tassannga annertunerungaatsiartussaavoq, aammalu sermersuatta imaanilu sikutta aakkiartorneranut sunniuteqarnerlorujussuartussaalluni
Nunat tamalaat akornanni silap pissusaa pillugu isumaqatiginninniarnerit Naalakkersuisunit pingaartinneqartorujussuupput, nunarsuup kissakkiartornerata sunniutai Kalaallit Nunaanni nunanilu issittuni allani ersarissunik takussutissaqareermata. Nunarsuarmi iliuuseqartoqanngippat uterfigisinnaanngisatsinnik (”point of no return”), tassalu ajoqusikkanik aaqqiissuteqarfigisinnaanngisatsinnik atugaqaleriaannaavugut”, Jens B. Frederiksen Qatarimut aallannginnermini oqarpoq.
Naalakkersuisup Danmarkimit aamma Sverigemit ministereqatini, Verdensnaturfondenimit aallartitaq kiisalu Nunani Issittuni Isumasioqatigiinni ataavartumik peqataatinneqartartut peqatigalugit decembarip ulluisa arfernanni nunat issittut ataatsimut saqqummersitsineranni, nunani issittuni silap pissusata allanngoriartorneranik, pisuussutsinik atuinermik aammalu nunat silap pissusaanut anguniagaannik aallussiffiusussami oqalugiassaaq.
Silap pissusaanut tunngatillugu naalakkersuisuunerit ataatsimiinnerat decembarip arfineq-aappaani naammassineqartussaq 17.000-it missaannik nunanit 300-neersunik peqataaffigineqarpoq.
