Jens B. aamma Palle naveersipput

Sanaartukkanut taakkununnga marlunnut ukiormanna aningaasaleeqqittariaqarnerit akuerineqarput. Ukiunulli tulliuttunut aningaasaleeqqinnissat tikinneqarmata akuersisoqanngilaq. Efterskolemut aningaasaliissutit 4,5 millioner koruuniniit 10 millioner koruuninut qaffannissaat akuersissutigineqarpoq, taamatuttaaq Aasianni GUp allilerneranut aningaasaliissutit 50 millioner koruuniniit 75 millioner koruuninut qaffanneqarput. Jens B. Frederiksen aamma Palle Christiansen ilisimatinneqarput sanaartukkannut taakkununnga aningaasaleeqqittoqassappat taakku aningaasanut inatsimmut ilanngunneqartariaqartut.

- Naatsumik oqaatigalugu sanaartukkat taakku marluk aqunneqarnerat isornartorsiorparput. Paasitinneqarsimanngilagut aningaasaliissutinik qinnuteqartoqarsimavoq missingersuutit C-it najoqquttaralugit. Tamanna periuserineqarneq ajorpoq. Minnerpaamik missingersuutit B-it najoqqutaralugit sanaartugassanut aningaasaliissutissanik akuersisoqartarpoq. Qularinngilara Maniitsup Efterskoleanut 10 millioner koruuninik aningaasaliisoqarsimasinnaanera inuusuttut ilinniagaqarluarnissaat politikkikkut anguniagaammat. Kisianni imaasiinnarlunga oqaatigisinnaanngilara Aasianni GU-mut 75 millioner koruuninik aningaasaliinissaq akuersissutigineqarsimassagaluarnersoq, Olga P. Berthelsen IA-meersoq aningaasaqarnermut ataatsimiititaliap siulittaasuata tullia KNR-imut oqarpoq.

Aningaasaqarnermut ataatsimiititaliap sanaartukkat taakku marluk aqunneqarnerat ilungersunartutut nalilerpaa aammalu Maniitsup Efterskoleata Aasiannilu GUp allilernissaannut missingersuusiortut sulinerat isornartorsiorlugu. Aamma Ineqarnermut Naalakkersuisup Jens B. Frederiksenip suliap ingerlanera tulluussimaarutiginngilaa.

- Allatut iliorsinnaanngilanga aningaasaqarnermut ataatsimititaliap isornartorsiuinera tusaatissatut tigusariaqarpara aningaasaliissutissallu siunissami aningaasanut inatsimmut ilanngunnissaat naammassiniarlugu. Sanaartugassat taakku arlaannaalluunniit suli aallartinneqanngilaq, aamma isumaqarpunga Maniitsup Efterskoleanut aningaasaleeqqinnissaq pisariaqarnavianngitsoq. Inatsisartuniit sakkortuumik piumaffigineqarsimavugut ukiup atuarfiusup aallartinnginnerani atuarfik naammassineqassaaq, maannalu ilikkarparput sakkortuumik piumaffiginnittoqaraluartoq najoqqutassat maleqqissaarneqartussaasut, tamannalu siunissami malinniarumaarparput, Ineqarnermut Naalakkersuisoq Jens B. Frederiksen oqarpoq.