Japanimi naalakkersuisut imermik qinngornernik ulorianartulinnik Manerassuarmut aniatitsiniartut
Japanimi atomimik nukissiorfimmi Fukushimami saliisoqaleruttorpoq, Fukushimamimi atomimik nukissiorfik Japanimi immap naqqani nunap 2011-mi sajorujussuarnerani ajutoorfiuvoq, nukissiorfiullu ingerlatsisuata maanna nalunaarutigaa imermik qinngornernik ulorianartunik radioaktiviusunik akulimmik immamut Manerassuarmut aniatitsisariaqalerluni.
Tuluit aviisiisa ilaat The Guardian Japanip avatangiisinut ministeriata nalunaarutaa aallaavigalugu taama allaaserisaqarpoq.
Japanip taama iliuuseqarniarnera avatangiisinik illersuiniaqatigiiffinnit assigiinngitsunit isornartorsiorneqarpoq.
Nunap iluata ernga Tritiumimik mingutsinneqarsimasoq matumani pineqarpoq. Tritium qinngornernik ulorianartunik akoqarpoq.
Atomimik nukissiorfiit sinerissamiittut imermik annikitsumik Tritiumitalimmik aniatitsigajuttarput. Tritium pinngortitami nassaassaavoq, annikitsuinnaallunili.
Avatangiisinik illersuiniaqatigiit apeqqusiisut
Imeq Tritiumitalik Fukushimamit ukiuni tulliuttuni 17-ini aniatinneqassaaq, akuneqarsimassallunili, taamaalinikkut mingutsitsivallaarunnaassalluni.
Taamatulli aniatitsisoqarniarnera avatangisiinik illersuiniaqatigiiffiit isornartorsiorpaat.
Japanimili naalakkersuisut tamanna tusaannginngitsuusaaginnarpaat:
- Erngup akuneqarluni immamut aniatinneqarnissaa allaqqunneqarsinnaanngilaq, Japanip avatangiisinut ministeria Yoshiaki Harada oqarpoq.
Immikkulli ilisimasallit siunersioqqaarneqassapput, kingornalu aalajangivittoqarumaarluni.