Janussen: Qinersinissamut ulluliussaq silatusaarneruvoq.
Taamaattoqassappallu qinersinissamik ulluliilluarnerussasoq, politikki pillugu naliliisartoq, Jakob Janussen oqarpoq.
- Maanna sivitsulersumi, Inatsisartuni sulineq soorlusooq naammassiniagaqarluni sulinertut isigineqarsinnaannginnera maluginiarneqartartoq. Oqallinnerit ima sakkortusitigisimapput allaat qularnanngitsumik Naalakkersuisuutitaqartut eqqrsalersimassallutik, tassa naammalerpoq qinersititsiniarta!
Jakob Janussenip oqarnera naapertorlugu, tassa naalakkersuisoqatigiit illuatungiliuttut Inatsisartuni ataatsimiinnerni pissuserisartagaannut naammaginnerlersimasut, taamaattumillu silaannarmik saliinissaq tullinnguussimasoq, Jakob Janussenip oqaatigaa, nangillunilu oqaatigalugu, partiip Siumup pissutsini allanngortinnippagu tamanna Inatsisartunut qinersinissami ajortumik kinguneqarsinnaammat.
- Inatsisartut ataastimiinnerisa nalaanni Siumut anguniagaqarpasinngitsutut sakkortuuliornerinnagajammillu sulinera, Inatsisartunut qinersineranni ajorsassutigissagaluarpassuk, taava Siumut iluminni eqqarsartariaqalissapput qanoq iliornissaminnut qulakkeerinnissallutik, Jakob Janussen oqarpoq.
Inatsisartuni silaannaap salinneqarnissaanik kissaateqarnerup saniatigut, Naalakkersuisut siulittaasuat aamma allamik pissutissaqarluarpoq martsip aqqaneq appaanni qinersisitsinissaminut. Tassami ilisimaneqareerpoq kommunimut qinersinissaq aprilip aappaanni pissasoq, tamassuma kingorna Inatsisartunut aatsaat qinersisoqassagaluarpat, tamanna Inatsisartunut qinersinermi partiit ilaannut sunniuteqarsinnaavoq ajortumik ajunngitsumilluunniit, Jakob Janussen naliliivoq imalu nangilluni.
- Siumut kommunimut qinersinermi qinigaatitaqarluassagaluarpat, tamanna Inatsisartunut qinersinermut sunniuteqarluartussaassaaq. Tamannalu Inuit Ataqatigiit ajorsassutigisinnaassagaluarpaat, tassami qinersisartunit arlalinnit kommunimut qinersinerit Inatsisartunut qinersinerit taputaartuukkajuttarmatigit, Jakob Janussen oqarpoq.
Maanna Naalakkersuisuusut ukiuni kingullerni angusarisimasaat pitsaasut suunersut Jakob Janussenimut apeqqutigaarput, taannalu ima akivoq.
- Aalisarneq pillugu nutarteriniarneq ukiorpassuarni piviusunngortinneqarsimanngitsoq piviusunngorpoq. Suliassat annertuut pillugit inatsisiliortoqarpoq aamma aningaasnut inatsit akuersissutigineqarpoq naak aningaasarsiorneq ukiuni kingullerni ajornakusooraluartoq taamaattoq amigartoorutaanngitsumik naammassineqarluni.
Martsip aqqaneq aappaanni Inatsisartunut qinersisoqassagaluarpat, Inatsisartut upernaakkut ataatsimiinnissaat, martsip arfineq pingajuanni aallartittussaagaluartoq taamaatiinnarneqassasoq, Inatsisartut siulittaasuata, Josef Tuusi Motzfeldtip oqaatigaa.
Naalakkersuisut siulittaasuata tusagassioertunik katersortitsinera TV-kkut toqqaannartumik isiginnaarneqarsinnaassaaq ualeru nalunaaqutaq marlunut tanneq aqqanermiit.
