VIDEO Jameson Landimi ikummatissiassanik misissuerusullutik qinnuteqartut
- Uuliamik gassimillu misissuiniarluni qinnuteqartoqarpoq, Aatsitassanut naalakkersuisoq Anda Uldum KNR-imut taama oqarpoq.
Ikummatissianik misissuinissamut qalluinissamillu akuersissutinik qinnuteqaateqartut marluupput, unammilleqatigiinnerlu ajalusoortikkumanagu suut tamarmik isertuunneqarallarput.
- Unammilleqatigiinnermik pisoqarmat, suliffeqarfiit sorliunersut taasinnaanngikkallarparput. Misissunissamut qalluinissamullu akuersissutinik qinnuteqartoqarpoq, taamaammat kikkuunersoq ajoraluartumik maannakkuugallartoq taasinnaanngilakka, Aatsitassanut Naalakkersuisoq Anda Uldum oqarpoq.
Qinnuteqartut kikkuuneri isertuunneqarallartoq
Jameson Landimi ikummatissiassanik misissuinissamut qalluinissamullu qinnuteqaateqartut maannamut isertuulluinnarneqaraluartut, Aatsitassanut Naalakkersuisoq neriuuteqarluarpoq.
- Takunikuuarput Cairn Energyp misissuinerata nalaani qanoq sunniuteqarluarsimatiginersoq illoqarfinnut qanigisaaniittunut, taamaammat aallartissinnaanissaat soorunami neriuutigaara. Aamma sulissutigiuaannarparput nunatsinni nunaqavissut arlaatigut peqataatinneqarnissaat aammalu aningaasanik isaatitsisinnaanerannut periarfissat pitsaasuunissaat, Aatsitassanut Naalakkersuisoq Anda Uldum oqarpoq.