Jørn Skov Nielsen Greenland Mineralsimi soraartoq

Greenland Mineralsip nunatsinni allaffimmi pisortaanera, Jørn Skov Nielsen atorfimminit soraarpoq.

Taanna siorna oktobarip ulluisa 31-anni soraarpoq.

Aatsitassarsiutileqatigiiffik 2021-mi decembarimi ukiup sisamararterutaani nalunaarusiami allappoq. Aatsitassarsiutileqatigiiffik Kuannersuarni aatsitassanik qaqutigoortunik uranimillu saniatigut piiaanissamut akuerissutissarsiniarnermik suliaqartuuvoq.

KNR-ip Jørn Skov Nielsen aamma Greenland Minerals Naalakkersuisut uranimik inerteqquteqalerneranut atatillugu apersorniarnikuugaluarpaat, iluatsinngitsumilli. Taakkunannga marlunnit akissuteqartoqanngilaq.

Jørn Skov Nielsen nunatsinni piffissami sivisuumi atorneqarpoq. Taanna 2002-mili Namminersorlutik Oqartussani atuuffinni arlalinni atorfeqartarpoq.

AAMMA ATUARUK Jørn Skov Nielsenip atorfimmut allamut periasaarnera uparuarneqartoq

Assersuutigalugu aatsitassarsiornermik susassaqarfimmi ukiorpassuarni qitiusumik inissisimavoq, kingornalu inuussutissarsiuteqarnermut naalakkersuisoqarfimmi pisortaasimalluni.

Taannalu 2020-mi aasaanerani Namminersorlutik Oqartussani atorfimminit soraarluni Greenland Mineralsimi pisortanngorpoq. Tamanna Inatsisartuni politikerit akornanni annertuumik oqallittoqarneranik kinguneqarpoq.

Jørn Skov Nielsenip aatsitassarsiutileqatigiiffimmi sulilernermini pisortat suliffeqarfiutaanni aatsitassarsiornermut tunngasunik ukiorpassuarni suliaqarnermini paasissutissat oqaatigeqqusaanngitsut pissarsiarisinnaasani atornerlussinnaagai ernumassutigineqarpoq.

Jørn Skov Nielsen aatsitassanut inatsit 2009-mi suliarineqarmat atorfilittani qitiulluinnarpoq, aamma nunatsinni uranimik piiaasinnaanngilluinnarnerup 2013-imi atorunnaarsinneqarnerani naalakkersuisoqarfimmi pisortaavoq.

Taassuma atorfimminik nikinnera pingaartumik Inuit Ataqatigiinnit isornartorsiorneqarpoq. IA tassunga atatillugu pisortat suliffeqarfiutaanni sulisut ilaasa atorfinikkallarsinnaasannginnissaanik atuutilersitserusukkaluarpoq.

Siunnersuulli taamani Siumumit siulittaasuuffigineqartunik naalakkersuisoqatigiinnik taperserneqanngilaq, pissutigalugu Jørn Skov Nielsenip nipangiusimasussaatitaanermik atsiornikuummat taamaammallu partii ernumanani.

Pisortat marluk uranimik inerteqquteqartoqaqqammernerani soraartut

Jørn Skov Nielsenip saniatigut australiamiut aatsitassarsiutileqatigiiffianni pisortaanerusimasoq, John Mair aamma soraarpoq. Taakku marluullutik Naalakkersuisut aatsitassarsiutileqatigiiffiup tullianik alloriarnissaanut periarfissakinnerulersitsisumik, uranimik inerteqquteqaleqqammerneranni soraarput.

Uranimik inerteqquteqarneq Inatsisartuni akuerineqartoq naapertorlugu uraniunngitsunik allanik piiaanermi, piiarneqartup uranimik qanoq akoqartigisinnaanera killilerneqarpoq.

Assersuutigalugu Greenland Minerals Kuannersuarni aatsitassanik qaqutigoortunik piiaarusuppoq. Aatsitassalli qaqutigoortut saniatigut uranimik pinngitsoortinneqarsinnaanngitsumik aamma qaqitsisoqartussaavoq.

AAMMA ATUARUK IA-p atorfilittat namminersortunut nuunngikkallartarnissaannik siunnersuutaa taperserneqanngitsoq

Uranimik inerteqquteqarnermi urani piiarneqartoq annikinnerpaaffissalerneqarpoq, tassa saffiugassami tonsimi ataatsimi urani annerpaamik 100 grammiusoq taamaallaat piiarneqarsinnaavoq. Aatsitassarsiutileqatigiiffiullu saffiugassamut 1 tonsimut uranip 300 grammip missaaniittup piiarneqartarnissaa nammineq nalilerpaa. Taamaammat tamanna killiliussamik qaangiissaaq, aatsitassarsiutileqatigiiffillu tamanna pissutigalugu aallartissinnaanani.

Greenland Mineralsip nunatta avataani periarfissat misissorniarlugit decembarimi allappaa:

- Inatsit sunniunneralu (uranimik inerteqquteqarneq aaqq.) erseqqissarneqarnissaata tungaanut…,  Kalaallit Nunaata avataani periarfissanik nutaanik, aatsitassarsiutileqatigiiffiup piffissami qaninnerusumi atorluarsinnaasaanik ujartuinissaq silatusaarnerullunilu eqqortuusoq siulersuisut isumaqarput.

Aatsitassanut naalakkersuisoq, Naaja Nathanielsen (IA) februaarip aallartinnerani ”pissutsit pissutsit oqaloqatigineqassasoq”, Aatsitassarsiutileqatigiiffik ukiup sisamararterutaani kingullermi allassimavoq. Aatsitassarsiutileqatigiiffik suliamik misissuinissamut inatsisilerituumik aamma suliaqartitsivoq:

- Aatsitassarsiutileqatigiiffiup Clifford Chance nunat tamalaat akornanni inatsilerinermik siunnersuisussatut toqqarpaa, aamma Bruun & Hjelje Advokatpartnerselskabilu danskit inatsisaannik siunnersuisussatut toqqarluni.