Jørn Skov Nielsenip atorfimmut allamut periasaarnera uparuarneqartoq

Aatsitassarsioqatigiiffik Greenland Minerals sapaatit akunneranni kingullermi atorfimmik taarsiisoqarsimaneranik nalunaaruteqarpoq.

Aatsitassarsiorfiup suliniutigivaa Kuannersuarni, Kujataani, saffiugassanik qaqutigoortunik uraninillu piiaanissaminnut qinnuteqarniarlutik. Greenland Mineralsillu Namminersorlutik Oqartussani atorfilik aatsitassarsiornermut oqartussaassuseqarnerpaaq – Jørn Skov Nielsen – pisortatut atorfinitseqqammerpaa.

Jørn Skov Nielsenip atorfinitsitaanera aatsitassarsioqatigiiffimmut pingaaruteqarluinnarpoq pilersaarusiorluagaallunilu.

Taamatut naliliivoq Ilisimatusarfimmi professor emiritus Birger Poppel, taannalu ilaatigut aatsitassarsiornermik ilisimatusarnikuuvoq.

- Inummik pissarsissapput Namminersorlutik Oqartussani, aatsitassarsiornermut tunngasunik periuutsinut, ingerlatseriaatsinullu tamanut ilisimannilluartumik – taakkulu saniatigut susassaqarfinnut allarpassuarnut. Kiisalu politikerit atorfillillu tamakkuninnga suliaqartut ilisimallugit, taamaammat atorfinititsineq pingaaruteqaqalunilu pilersaarusiorluagaavoq, Birger Poppel oqarpoq.

AAMMA ATUARUK Naalakkersuisoqarfimmi pisortaasimasoq Greenland Mineralsimi pisortatut atorfinittoq

Jørn Skov Nielsenimik atorfinititsineq peqatigiiffimmit Urani Naamik-mit ernumanartoqartitsivoq, taakkumi Greenland Mineralsip Kuannersuarni aatsitassarsiornissaannut akerliugamik.

- Isumaqarpugut annilaanganartuusoq, taamaattorli taamatut pisoqartuartarpoq. Atorfinitsitseriaaseq taamaatsillugu naatsorsuutigisariaqarparput taamatut pisoqartuaannarnissaa, tassa inuit ataasiakkaat suliffeqarfinnut sunulluunniit suliffissarsiornissaminnut periarfissaqartuarlutik, taamatut oqarpoq Urani Naamik-mi siulittaasoq Mariane Paviasen.

Ernumanartoqarnera professor emiritus Birger Poppelip ilalerpaa, taannami isumaqapoq, Namminersorlutik Oqartussat ajornartorsiut aaqqiivigisimanngikaat.

- Ernumanartoqarpoq taamatut ilisimasaqarnerat, Namminersorlutik Oqartussat periarfissaqarsimagaluarput tamakkununnga malittarisassaliornissaminnut, taamaammallu isumaqarpunga annertuumik eqqumaffigineqanngitsoorsimasoq, Birger Poppel oqarpoq.

Jørn Skov Nielsen ilaatigut atorfiliusimavoq pingaaruteqarluinnartoq, aatsitassarsiornermi inatsit sananeqarmat 2009-mi, taamatuttaaq Naalakkersuisoqarfimmi pisortaasimavoq Kalaallit Nunaanni Uranimut akuersaanngilluinnarneq 2013-imi peerneqarmat. 

Pisortaniit namminersortunut

Transparency Greenland Jørn Skov Nielsenimut tunngasorpiamut oqaaseqarumanngilaq, taamaattorli oqaatigerusuppaa nalinginnaasumik atorfillit nipangiussisussaassusermik pituttugaasartut paasissutissanillu isertuussassanik ingerlatitseqqusaanngitsut.

AAMMA ATUARUK Greenland Minerals arlalinnik avatangiisinut sunniutaasinnaasunut tunngasunik suli iluarsisassaqartoq

Piviusumili tamatuma piginngitsoortinnissaa ajornakusoorsinnaavoq, inuit toqqaannartumik pisortaniit namminersortunut nuukkaangata.

Aaaqqiissutissatut atorneqarsinnaasoq tassaavoq, pisortani atorfillit killeqartilerlugit - politikerit atorfillillu pisortani sulisimasut, suliamut tunngasuni ukiuni marlunni namminersortuni atorfinissinnaannginnissaannut.

- Kalaallit Nunaanni pisortani atorfikkaat ullormiit ullormut namminersortunut nuussinnaanerat killilersorusukkutsigu, malittarisassiortoqartariaqassaaq, soqutigisanik aporaaffeqartoqarsinnaanera millisarniaraanni, taamatut oqaaseqarpoq Transparency Greenlandimi siulittaasoq Birita í Dali nangillunilu:

- Nalinginnaasuussavorli atorfilik taartisiaqartinneqassasoq, inuup killeqanngitsumik toqqaasinnaassusia piffissaliinikkut killilerneqassappat, periarfissaavorli, Namminersorlutik Oqartussat eqqarsaatersuutigisinnaasaat.

Aatsitassarsioqatigiifik apeqqutinut akiumanngitsoq

KNR-ip Jørn Skov Nielsen apersorniarsimagaluarpaa, tamannali Greenland Mineralsip unitsissimavaa.

Aatsitassarsioqatigiiffiup pisortaanera, John Mair, Australiamiit mailikkut allappoq, Jørn Skov Nielseni apeqqutinut akissanngitsoq, aatsitassarsioqatigiiffimmi atorfinerlaajummat, Greenland Mineralsilu atorfilinnut ataasiakkaanut tunngasunut oqaaseqarumanngilaq, tamanut ammasumik apeqqutinut akerusunnani.

Pisortaaneq allappoq aatsitassarsioqatigiiffik ”Namminersorlutik Oqartussanut suleqatinullu allanut oqaloqateqarnissaminnut ammasoq”, taamaattorli apeqqutinut tamanut ammasunut, Jørn Skov Nielsenip pisortatut atorfinitsitaaneranut tunngasunut atuutinngitsoq.

KNR-ip ilaatigut paaserusussimagaluarpaa Jørn Skov Nielsen, Namminersorlutik Oqartussani atorfeqarnermigut nipangiussisussaatitaanini qanoq atuutsissinnaaneraa, taamatut aatsitassarsiortuni pisortatut sulileruni, paasissutissanillu isertuussassanik iluaquteqarsinnaanini.