IA-p atorfilittat namminersortunut nuunngikkallartarnissaannik siunnersuutaa taperserneqanngitsoq
Pisortat suliffeqarfiutaanni qaffasissumik atorfilittat pingaarutillit inuussutissarsiortunut namminersortunut toqqaannartumik nuussinnaasassappat?
Naalakkersuisoqatigiit Siumut, Demokraatit Nunatta Qitornaalu tamanna ajorinngilaat. Taakkua Inuit Ataqatigiit atorfilittat namminersortunut nuunngikkallartarnissaasa immikkut piumasaqaataanissaanik siunnersuutaannut akerliupput.
AAMMA ATUARUK IA-p atorfinikkallarsinnaannginneq atorfilittanut politikerinullu atulersikkusukkaa
Kissaatigigaanni tamanna atorfininnermut isumaqatigiissutini immikkut piumasaqaatigineqarsinnaareersoq, Naalakkersuisut isumaqarput. Tamatumalu saniatigut peqquserluttoqannginnissaanik qulakkeerisunik assigiinngitsunik malittarisassaqareerluni.
Atorfilittallu namminersortunut nuunngikkallarsinnaanerannik immikkut piumasaqaatiliortoqassappat, tamanna akileraartartunit akilerneqassasoq, Naalakkersuisut erseqqissaapput. Tassami atorfilittap atorfilittaanermini akissarsiami ilaanik namminersortunut nuunngikkallarsinnaanermini akissarsiaqartitaasariaqassammat.
Namminersortunut nuunngikkallarsinnaaneq soorlu ukiumik ataatsimik sivisussuseqassappat, tamanna inummut ataatsimut agguaqatigiissillugu 500.000 koruunit missaannik akeqassasoq, Naalakkersuisut oqarput.
Pisortat suliffeqarfiutaannit aatsitassarsioqatigiiffimmut
Pisortat suliffeqarfiutaanni atorfilittaq aatsitassarsioqatigiiffmmut aasaq pisortanngoreersorlu, Inuit Ataqatigiit atorfilittat namminersortunut nuunngikkallartarnissaannik piumasaqaateqalernissaq siunnersuutigaat.
Aatsitassanut naalakkersuisoqarfimmimi pisortaasimasoq atorfilittatullu pingaarnersanut ukiuni qulikkuutaani ilaasimasoq, Jørn Skov Nielsen, atorfilittaajunnaariarluni aatsitassarsioqatigiiffimmi namminersortumi Greenland Mineralsimi pisortanngormat taama siunnersuuteqarput.
Greenland Minerals Kujataani aatsitassarsiulersaartuuvoq.
Pisortat suliffeqarfiutaanniit aatsitassarsioqatigiiffimmi pisortanngornera ilisimatuunit politikerinillu isornartorsiorneqarpoq. Jørn Skov Nielsenimmi paasissutissanik isertuussanik pisortat aatsitassanut tunngasuni suliffeqarfiutaanni ukiorpassuarni atorfeqarnermini pissarsiarisaminik ingerlatitseqqeeratarsinnaanera ernummatigaat.
Jørn Skov Nielsen aatsitassanut ikummatissanullu inatsit 2009-imi suliarineqarmat atorfilittani pingaarnersanut ilaavoq, nunatsinnilu uranimut akuersaanngilluinnarneq 2013-imi atorunnaarmat naalakkersuisoqarfimmi pisortaalluni.
AAMMA ATUARUK Jørn Skov Nielsenip atorfimmut allamut periasaarnera uparuarneqartoq
Aatsitassarsioqatigiiffimmi pisortanngornera Inuit Ataqatigiinnit Inatsisartunut oqallisigisassanngortinneqarpoq. Jørn Skov Nielsenili nipangiussisussaanermut atsiornikuummat, naalakkersuisoqatigiit ernumanngillat.
- Inuttaata tamanna nammineq akisussaaffigaa. Nipangiussisussaanermut atsiornikuuvoq. Nipangiussisussaanini unioqqutissimagaa paasineqarpat, tamanna eqqartuussivimmut soorunami suliassanngortinneqarsinnaavoq, Rachel Ingemann Demokraatineersoq oqarpoq.
Inuit Ataqatigiit siunnersuutaat marlunngornermi ualikkut siullermeerneqarpoq, Partii Naleraq siunnersuutaannut tapersiisutuaavoq.
Siunnersuutaat Inatsisartuni aappaagu februaarip ulluisa 23-anni aappassaaneerneqarpat, partiit taasissutigissavaat.