Ivittuut isertitaqareerput
Nunami Namminermi Pissutsinut Allaffeqarfimmi siunnersorti, Leif Scharling, KNR-imit attavigaarput qanorpiaq immikkut qinikkanik toqqaasoqartarneranik paasiniaavigalugu:
- Kommune Kujalleq assersuutigissagutsigu, taava kommuniusimasunit pingasunit, tassa Narsaq, Qaqortoq aamma Nanortalimmit katitigaavoq. Kommune Kujallermi kommunalbestyrelsimi inissani 15-suni illoqarfiit Narsaq, Qaqortoq aamma Nanortalik qinikkanik sinniisulerneqartarput, Leif Scharling oqarpoq.
Najukkami immikkut qinigakkatut inissittarpoq partiip taaneqarnerpaap qinigaanerpaartaa. Assersuutigalugu Narsami partii sorleq qinerneqarnerpaasimanersoq takuneqassaaq, kinalu aamma partiimi tassani qinigaanerpaasimanersoq, Narsami najugaqarnersoq takuneqassalluni.
Taamaalilluni illoqarfimmi mikinerusumeersoq parteeqatiminit illoqarfimmit anginerusumeersumit taaneqarungaluartumillu sanioqqussiinnarluni kommunalbestyrelsimut ilaasortanngorsinnaavoq.
- Kisitsisinik assersuuteqassagutta, Illoqqoortoormiuni 23-nik taaneqartoq isersinnaavoq, naak maani Nuummi Siumukkormioq 100-it sinnerlugit taaneqarluni isinngitsooraluartoq. Kommuuniusimasuni Ivittuut Kommunerisimasaat mikinersaavoq, tassanngaanniillu najukkami immikkut qinersisoqassaaq, naak taasisinnaasut amerlanngikkaluartut, Leif Scharling oqarpoq.
Tassanilu najukkami immikkut qinigakkatut inissippoq Anni K. Rasmussen. Taanna attaviitsutut qinigassanngortippoq, Ivittuullu Kommunerisimasaani allamik qinigassanngortittoqanngimmat Kommuneqarfik Sermersuumi qinikkatut iserpoq.
- Qanoq oqassangalunniit naluara tupinnangaarmat. Uanga qinigassanngortippunga allamik qinigassanngortitassaqanngimmata. Ilakka piumanngimmata allatut ajornartumik angersimavunga, Anni K. Rasmussen oqarpoq.
Sumiiffiillu puiguinnarneqannginnissaat anguniarlugu sumiiffinni immikkut qinikkat atuutsinneqarput, taamaalilluni kommuniusimasut tamarmik sinniisoqarsinnaaniassammata, naak ilaatigut Ivittuut Kommuunerisimasaat maanna arfineq pingasuinnarnik qinersisinnaasunik najorneqaraluartoq.
Ivittuuni innuttaasut arfineq-pingasuusut Anni K. Rasmussen qinerpaat.
