Ivigaasat innuttaasut peqqissusaannut iluaqutaassasut

DBU GBU-lu suleqatigiillutik millionerpassuarnik nalilinnik ivagaasanik arsaattarfinnik arsaattarfinnillu mikisunik nunatsinni pilersitsiortorniarmat peqqissutsimik timersornermillu immikkut ilisimasalik, Peter Krustrup, Københavnip ilisimatusarfianeersoq nuannaarpoq.
DBU og GBU vil udbrede kunstgræs til byer og bygder i hele landet
Allattoq Kenneth Elkjær
aggustip 18-at 2016 15:48

Peter Krustrup ”Siunissami timersornermi” ataatsimeersuarnermi peqataasut ilagaat, sisamanngornermilu GBU-p DBU-llu nunatsinni arsaannerup ineriartortinnissaa pillugu saqqummiisoqarmat malinnaalluni. 

Kattuffiit taakku nunatsinni arsaattartunut atugassarititaasut pitsanngorsarniarpaat. Tassami illoqarfinni sisamani arfinilinniluunniit arsaattarfissuarnik ivigaasaasunik pilersitsiniarput. Nunaqarfinnilu arsaattarfeeqqanik ivigaaraasunik assiaqusersukkanik aamma pilersitsiniarlutik. Arsaattarfiillu taakkartorneqartut pilersinneqarpata inuiaqatigiit peqqissusaannut iluaqutaassasoq Peter Krustrup isumaqarpoq. 

- Arsaaffinni timersornissamut periarfissat ullumikkut pissutsinut sanilliullugit amerlissapput. Timersuutigalugulu arsaakkusuttut inissaqartinneqarnerulissallutik, Peter Krustrup KNR-imut oqarpoq. 

Taassuma aallusivinngikkaluarluni timersuutigalugu arsaakkusuttut inissaqartinneqarnerulernissaat torragaa. 

Aamma atuaruk DBU-p siulittaasua Nunatsinni arsartarnerup siuarsaaviginissaanut 20-25 millioninik aningaasassaqartitsisoq

DBU-p Københavnip ilisimatusarfia suleqatigalugu arsaaffinni mikisuni sungiusariaatsimik ineriartortitsillutillu pilersitsisimapput. Tamannalu timersortartunit aaliangersimasunit soqutigineqarsimaqaluni. 

- Iligiit pingasukkaarlutik unammisarput. Pingaarnertulli sungiusarneq aallunneqartarpoq unammersuaarneq pingaarnerunani. Taamatut aaqqissuussineq arnarpassuarnit soqutigineqarpoq, atuisullu unamminermik pingaartitsinatik aalanissamik pingaartitsisuullutik. Taamaammat arsaaffiit mikisut sunniuteqarluarput, Peter Krustrup nassuiaavoq.

Aamma atuaruk Nunarput isikkamik arsaallaqqinnerpaanut unammisalersinnaasoq

Arsaanneq timersuutaavoq pitsaalluinnartoq. Saarnginik nukittortitsisarpoq, sukkortunut iluaqutaasinnaalluni kiisalu aap naqitsineranut qaffisippallaartunut nakorsaatitut pitsaatigisinnaalluni, Krustrup nassuiaavoq nammineq ilisimasassarsiorsimanini aallaavigalugit nassuiaavoq. 

- Arsaanneq sakkoralugu inooriaatsip kingunerisaanik nappaataalersartunik akiuisoqarsinnaavoq. Tassami sapaatip akunneranut marloriarluni akunneq ataaseq arsaassinnaagaanni tamanna peqqissutsimut pitsaasumik sunniuteqarsinaavoq, ilisimatooq naggasiivoq.