Ivalu Clasen nunat tamalaat akornanni pinnerneqqusaannermi finalemut annguttoq
27-nik ukiulik, Ivalu Clasen Italiap illoqarfiani Napolimi Miss Europe Continentalimut peqataareerluni Danmarkimut uteqqeqqammerpoq. Miss Europe Contenental tassaavoq pinnerneqqusaanneq, tassanilu nunanit 30-nit peqataasoqarpoq.
Nunanit assigiinngitsunit arnamik suminngaanneernerminnik pinnernerminnillu takutitsisunik peqataasoqarpoq.
Kalaaleq peqataasoq finalimut annguppoq, taamaakkaluartorli Miss Europe Continentalinngunngitsoorpoq.
- Finalepladsimut annguteqataavunga kisianni ajoraluartumik ajugaanngitsoorpunga, kisianni uanga pingaartinnerpaavara peqataanera taavalu Kalaallit Nunaata saqqummiussimanissaa, Ivalu Clasen KNR-imut oqarpoq.
AAMMA ATUARUK Maria Grødem Tyskland-mi crossfittertuni ajugaavoq
Ivalu peqataanissamut kajumissaarneqarsimavoq, taassumalu kalaaleqatini tulluusimaartikkusullugit pinnerneqqusaannermut kajumissuseqarsimavoq.
- Sumiuunitta, kinaassutsitta, kulturittalu tulluusimaarutiginissaat uannut pingaaruteqarpoq, Ivalu oqarpoq.
Ivalup ulluni Italiamiinnermini peqataasut allat naapippai, tassanilu suminngaanneernertik avitseqatigiissutigaat. Taassuma naapitarpassuarmi Kalaallit Nunaanneernini tupiguutigisimagaat oqaatigaa.
Danmarkimit Nuummut
Ivalup ernini, ernimilu angutaa ilagalugit 2016-imi Danmarkimut nuupput. Tassanilu peqqissaasunngorniarpoq, kingornalu Esbjerg Sygehusimi atorfinilluni.
Ivaluli Nicollu angutaa 2020-mi qimapput, erneratalu angutaa nunatsinnut nooqqilluni. Ivalu aviisimut AG-mut taama oqarpoq.
Ivalup ernera arfinilinnik ukiulik angunni ilagiartorlugu ukioq manna februaarimi nuuppoq, Ivalulu qaammatip tulliani malinnissaaq.
