Tusagassiuutit: Ivaaqqamut tunngatillugu suliap suliassanngorteqqinneqarnera taamaatinneqartoq

Ivaaqqamut tunngatillugu eqqartuussivimmi suliaq Nunatta Eqqartuussisuuneqarfiani marlunngornermi suliarineqaqqittussaagaluarpoq, illersuisulli unnerluussisussaatitaasullu suliassanngortitseqqinnertik taamaatippaat. Taamaammat eqqartuussivimmit eqqartuussut atortuuvoq.

Allattoq Nicole Sander Bertelsen

decembarip 05-at 2023 10:53

Nutserisoq Connie Fontain

Ivaaqqamut tunngatillugu eqqartuussivimmi suliaq oqallisaangaatsiartoq tamaannga killeqarpoq.

Illersuisup pineqaatissiissummik sakkukilliiniarluni suliassanngortitseqqinneq tunuartimmagu unnerluussisup eqqartuussummik sukannernerulersitsinissamik suliassanngortitseqqinnini taamaatippaa. Sermitsiaq.AG ullaaq maanna taama allaaserisaqarpoq.

Suliaq Nunatta Eqqartuussisuuneqarfiani marlunngornermi suliarineqaqqittussaagaluarpoq.

Taamaammat Eqqartuussisoqarfik Kujallermit ukiunik marlunnik qaammatinillu piumasaqaatitaqanngitsumik pineqaatissinneqarsimasunut inissiisarfimmiittussanngortitsineq atortuuvoq.

Aamma atuarukIvaaraq pillugu suliami eqqartuussineq: Angut 62-inik ukiulik pineqaatissinneqartoq

62-inik ukiullip, Laban Kristoffersenip, arnamik arlalinnik innarluuteqartumik eqqarsartaatsimigullu innarluuteqartumik, arnap najugarisaani Ivaaqqami suliffigisamini 2021-mi juullip ukiortaallu akornanni marloriarluni kinguaassiuutitigut atornerluisimalluni eqqartuussivimmi killisiorneqarnermini nassuerutigaa.

Arnaq siorna septembarimi nukappiaqqamik ernivoq.

SULIAQ IVAARAQ PILLUGU

Arnaq 23-nik ukiulik, annertuumik innarluutilik 2022-mi septembarip aappaani ernertaarpoq
Kalaallit Nunaanni Politiit kinguaassiutitigut atornerluisoqarsimaneranik nalunaarfigineqarlutik erngertumik uppernarsarpaat
Meeqqanut, inuusuttunut, ilaqutariinnut peqqissutsimullu naalakkersuisoq, Mimi Karlsen nunatsinni ulloq unnuarlu paaqqutarinniffinni pissutsinik misissuinermik septembarip tallimaani aallartitsivoq
Angut 62-inik ukiulik pinngitsaaliilluni atornerluisimasutut 2022-mi novembarip aallaqqaataani tigusarineqarpoq
Mimi Karlsenip meeqqanut inuussuttunullu paaqqutarinniffinni aamma innarluutilinnik ulloq unnuarlu paaqqutarinniffinni arlalinnik sukaterisoqarsimasoq kinguninngua nalunaarutigaa
Mimi Karlsenip Ivaaraq siullerpaamik marsip 15-ianni pulaarpaa

Iliuusereriikkanut kinguneqartitsineq qaffasinnerusoq

Unnerluussisussaatitaasuunerup, Lars Petersenip unnerluussisussaatitaasunit suliassanngortitseqqinnerup taamaatitsinertik Sermitsiaq.AG-mut ima tunngavilersorpaat:

- Suliaq pissutsillu pineqartut nalilerneratigut suliami qaffasinnerusumik kinguneqartitsilernissarput naatsorsuutigisinnaannginnatsigu suliassanngortitseqqinnerput taamaatipparput, Lars Petersen Sermitsiaq.AG-mut oqarpoq.

Illersuisut suliassanngortitseqqinnerminnik sooq taamaatitsinerat allassimanngilaq, suliarli tamaannga killeqarpoq. Angut 62-inik ukiulik siorna novembarimili tigummigallarneqalersoq, unnerluussisussaatitaasuuneq Sermitsiamut oqarpoq.

Eqqartuussiviup Laban Kristoffersenip ukiuni marlunni qaammatinilu qulingiluani pineqaatissinneqarsimasunut inissiisarfimmiittussanngortinneqarneranut atatillugu arnaq piffissami pinerliffiusuni naak 22-nik ukioqaraluarluni innarluuteqarnera pissutigalugu meeqqatut isigineqarnissaa tunngavilersuutigaa.

Illersuisullu eqqartuussut ukiumik ataatsimik qaammatinillu qulingiluanik sivisussuseqarnissaa piumasaqaatigaa, arnarmi ukiuni pissutigalugit inersimasuummat.

Eqqartuussiviup unnerluussisussaatitaasut kaammattuuteqarnerat malippaa. Laban Kristoffersenip marloriarluni pinngitsaaliisimanerminik nassuerutiginninnera eqqartuussiviup pingaartuutippaa.

Eqqartuussiviullu arnamut 150.000 koruuninik taarsigassanngortitsisoqarnissaa aalajangerpaa.