Ittoqqortoormiini pasinartumik toqutsisoqarnera aapparisap toqutsinerigaa

Tunup illoqarfiani inuit marluk toqunerat politiinit misissuiffigineqartoq, Sermitsiaq.AG-p KNR-illi decembarip tallimaani allaaseraat.

Politiit naapertorlugit toqungasuni marlunni pasinartoqarpoq, politiillu misissuinerannut atatillugu pinerluttulerisut toqungasullu timaannik misissuisartut Ittoqqortoormiiliartitaapput.

Ittoqqortoormiini Politiit toqutsisoqarlunilu imminut toquttoqarsimasoq ataasinngornermi paasissutissiissutigaat.

- Aappariit toqunerat pineqarpoq, tassa angutip arnaq aallaariarlugu kingorna imminut aallaasimavoq, politiassistenti, Peter Pedersen oqarpoq.

Taassuma suliaq suli misissuiffigineqarnerarpaa. Politiit toqutsinermut suna peqqutaasimanera ilaatigut suli ilisimanngilaat:

- Toqutsisoqarnissaanut pisoqarsimaneranik takussutissaqanngilaq, Peter Pedersen oqarpoq.

AAMMA ATUARUK Ittoqqortoormiit toqusut politiit misissorpaat

Toqutsisoqarnerata nalaani imigassamik atuisoqarsimanersoq paasiniarlugu teknikkikkut misissuinerit suli amigaataapput.

Ittoqqortoormiini toqutsisoqarnera nunatsinni siorna toqutsinerpassuarnut ilaatigut ilaavoq. KNR-imit nunatsinni politiit 2017-imi toqutsisoqarneranik suliat arfineq-pingasut suliarisimagaat juullinngitsiartoq oqaluttuaraarput.

Taakkulu amerlavallaarujussuartut, politimesterip, Bjørn Tegner Bayip sukannerusumik oqaatigaa.

- Tassa toqutsinerit pingasuugunik, arfiniliugunik arfineq pingasuugunilluunniit taava toqutsinerit pingasunik, arfinilinnik arfineq pingasunillu amerlavallaarput. Inuiaqatigiinni 56.000-iusuni ukiut amerlanersaanni toqutsisoqartartussaanngikkaluarpoq, Bjørn Tegner Bay oqarpoq.

AAMMA ATUARUK 2017-imi toqutsisoqarsimaneranik paasiniaanerit politiinut nammakkiisut